Қазақстанда жұмыссыздық деңгейі Франция, Финляндиядан да төмен бе
АСТАНА. KAZINFORM — Қазақстанда ресми дерек бойынша жұмыссыздық көрсеткіші 5 пайызға жетпейді.
Орталық коммуникациялар қызметі алаңында «Халықты жұмыспен қамту» тақырыбында өткен баспасөз мәслихатында келесі сұрақ қойылды: Неліктен Финляндия немесе Францияда жұмыссыздық деңгейі 8 пайыздан жоғары, ал бізде 4,6 пайыз? Бұл елдерде мемлекеттік органдар нашар жұмыс істей ме, әлде бізде есептеу әдісі басқа ма?
— Иә, расымен өткен жылдың қорытындысы бойынша жұмыссыздық деңгейі 4,6% құрады. Бұл көрсеткішке біздің министрлік, өңір әкімдіктері мен инвестициялық жобаларды жүзеге асырудың арқасында қол жеткізілді. Бұл мақсатта 6 бағыт бойынша шаралар бар, — деп жауап берді Еңбек және халықты әлеуметтік қорғау вице-министрі Асқар Биахметов.
Вице-министрдің мәлімдеуінше, былтыр ел аумағында 979 мың азамат жұмыспен қамтылды, оның ішінде 714 мың адам тұрақты жұмыс тапты.
Сондай-ақ елдегі жұмыссыздық көрсеткішіне қатысты министрлікке қарасты Халықты жұмыспен қамту департаментінің директоры Азиз Ибрагимов ойын ортаға салды. Оның айтуынша, ресми жұмыссыздыққа қатысты есепті Ұлттық статистика бюросы жүргізеді.
— Тіркелген жұмыссыздық деген ұғым бар, яғни адамдар жұмыссыз ретінде тіркеліп, одан әрі көмекке жүгінеді, сондай-ақ тіркелмеген жұмыссыздық бар, яғни жұмыссыз ретінде тіркелмеген. Сондықтан бұл мәселе мемлекеттің жұмыссыздық есебіне қатысты қолданатын әдістемесімен байланысты, — дейді ол.
Бұған дейін хабарлағанымыздай былтыр елімізде 714 мың адам тұрақты жұмыспен қамтылды.
Айта кетсек, 2031 жылға қарай елімізде 1,6 млн кадр қажет.
