Қазақстандағы азаматтық авиация мамандарының 40 пайызы – әйелдер
АЛМАТЫ. KAZINFORM – Алматыда гендерлік теңдікке арналған Халықаралық азаматтық авиация ұйымының (ИКАО) аймақтық семинары өтіп жатыр.
Азаматтық авиация комитетінің төрағасы Салтанат Томпиева азаматтық авиациядағы гендерлік теңдік ел бойынша көш бастап тұрғанын атап өтті.
— Қазір Қазақстанда азаматтық авиацияда 23 мың қызметкер жұмыс істейді, оның 40%-дан астамы немесе 9 500-ге жуығы әйел. Елде 34 әйел ұшқыш, тіпті ұшақ командирлері де бар, — деді Салтанат Томпиева агенттік тілшісіне берген сұхбатында.
Сонымен қатар, республика бойынша 100-ден астам әйел әуе диспетчер, 600-ге жуық инженер-әйел және борттық қызметте 2200-ден астам қыз-келіншек жұмыс істейді.
— Мен тек бұрыннан ер адамға тән техникалық мамандықтарды айтып отырмын. Бірақ ең бастысы – адамның тәжірибесі, мақсаты мен кәсібилігі. Сондықтан біз ер және әйел мамандықтары туралы стереотиптерден бас тартуымыз керек. Бұрын авиациядағы әйелдер тек билет сата алатын немесе стюардесса болып жұмыс істей алатын сияқты көрінетін. Бірақ, шын мәнінде, Қазақстанда авиация саласында жұмыс істейтін және ұшу қауіпсіздігіне жауапты әйелдер көп, — деп атап өтті Салтанат Томпиева.
Ол сондай-ақ қалыптасқан стереотиптерге қарамастан, әйелдер үшін ешқандай кедергілер жоқ екенін тілге тиек етті.
Сонымен қатар, елімізде гендерлік теңдік қолдауға ие. Мысалы, Қазақстандағыдай бала күтімі бойынша жұмыс орнын сақтап қалу мүмкіндігі барлық елде қарастырылмаған.
Халықаралық азаматтық авиация ұйымына аймақтағы 56 мемлекет кіреді, оның ішінде Қазақстан да бар.
— Гендерлік теңдік тақырыбына арналған шара алғаш рет өткізіліп отыр. Неліктен Қазақстан таңдалды, өйткені біз гендерлік теңдік пен азаматтық авиациядағы әйелдер саны бойынша көшбасшымыз, — деді ол.
Оның айтуынша, Қазақстанда авиация саласы қарқынды дамып келеді.
— Пандемияға дейінгі кезеңмен салыстыратын болсақ, қазір өсім 50 пайыздан асты, басқа елдерде біздегідей өсім жоқ. Бізде ішкі ағын да, халықаралық ағын да бар, сондықтан тапшылық бар. Сондықтан да біз қазір жастарды салаға тарту мақсатында көптеген көрме мен іс-шаралар өткізіп жатырмыз, — деп түйіндеді сөзін Салтанат Томпиева.
Шараға Қазақстанның және шетелдің авиация саласының, халықаралық ұйымдардың (ИКАО, Eurocontrol, EASA, IATA, IFATCA, SkyTeam, ACYFI ), авиациялық компаниялар мен іскер топ өкілдері қатысып жатыр
Еске салайық, бұған дейін Халықаралық азаматтық авиация ұйымы (ИКАО) Қазақстанның азаматтық авиация саласын 2050 жылға дейін дамытудың стратегиялық бас жоспарын әзірлейтіні туралы жазғанбыз.
Сондай-ақ ICAO президенті авиация болашағы мен экологиядағы көшбасшылық туралы айтқан болатын.
