Қазақстандағы жалғыз тұқымбақ несімен ерекше
СЕМЕЙ. KAZINFORM — Мемлекет басшысы Қасым Жомарт Тоқаев биылғы Жолдауында «Семей орманы» резерватындағы орман тұқымбағын атап өтіп, басқа облыстарда да осындай жобаны қолға алу қажеттігін жеткізген болатын. Kazinform тілшісі осы бақтың несімен ерекше екендігін біліп көрді.
Президент өз Жолдауында Қазақстанның бірегей жануарлар және өсімдіктер әлемін сақтау мәселесі әрдайым өзекті болып қала беретінін, мемлекет алдағы уақытта да орманды өрттен қорғау үшін барлық қажетті шараны қабылдайтынын атап өтті.
«Елімізді көгалдандыру жұмысының қарқыны жаман емес. Тоқтап қалмай, оны жалғастыру қажет. „Семей орманы“ аясында орман тұқымбағы бар. Бұл — Орталық Азиядағы халықаралық озық талаптарға сай көшет өсіретін бірден-бір кешен. Осы жобаны басқа да орманды аймақтарда жүзеге асырған абзал. Орман-тоғайды көбейту бүкіл елді жұмылдыратын нағыз халықтық идеяға айналуы керек. Сондықтан ел ішінде ауқымды ақпараттық-түсіндіру жұмыстарын жүргізген жөн», — деді Қасым-Жомарт Тоқаев.
Орман тұқымбағы жайлы кеңірек ақпарат алу үшін «Семей орманы» мемлекеттік орман табиғи резерваты бас директорының орынбасары Әсет Саиновке хабарластық.
«Семей орманындағы» Канонерка орман тұқымбағы кешені 2016 жылы құрылып, сол жылы қолданысқа берілген. Осы уақыттан бері бақтағы жасыл желектер көлемі ұлғайып келеді. Бірақ бізде қарағай ғана өседі. Қылқанжапырақты мәңгі жасыл өсімдік 500-600 жылға дейін өмір сүреді. Қарағай жайқалған тұқым бақтың жалпы ауданы — 20,4 гектарды құрап отыр», — дейді ол.
Тұқымбақты күтіп-ұстап, оған жаңа көшет отырғызумен 26 қызметкер тұрақты түрде айналысады. Сондай-ақ маусым сайын 20 адам уақытша жұмысқа алынады. Мұнда көшеттердің өсуі толықтай қадағаланады.
«Алдағы уақытта тұқымбақ кешенінің топырағын жақсарту жұмыстары жүргізіледі. Атап айтқанда, органикалық тыңайтқыштар, сидераттар енгізу көзделген. Резерват аумағында аталған кешеннен бөлек, 8 орман тұқымбағы бар. „Таза Қазақстан“ жалпыұлттық экологиялық акциясы жарияланған уақыттан бастап бізде көшет егу жұмыстары жаңа қарқын алды. Алдағы уақытта да бұл бағыттағы шараларды жалғастырамыз», — дейді Әсет Саинов.
Резерваттың бас директорының орынбасарынан былтыр «Семей орманында» болған алапат өрттен жанып кеткен аумақта осы уақытқа дейін қандай жұмыстар атқарылғанын сұрап көрдік.
«Қазіргі уақытта от шырпыған аумақты ағаш отырғызуға дайындап жатырмыз. Яғни жанып кеткен ағаштарды кесу, тазалау жұмыстары жүргізілуде. Өртенген алаңда орман екпелерін отырғызудың жаңа жұмыс жобасы қарастырылуда», — деп жауап берді ол.
Президенттің 2020 жылғы Жарлығына сәйкес 5 жыл ішінде ел бойынша орман алқабына 2 млрд ағаш отырғызылуы тиіс.
Соған орай «Семей орманында» 2021-2027 жылдары орман алқабын отырғызуды кеңейтудің кешенді жоспары жасалған. Барлығы 133 млн ағаш отырғызу жоспарланып отыр.
Сол жоспар бойынша:
- 2021 жылы — 3600 гектарға 17 млн көшет;
- 2022 жылы — 4500 гектарға 21 млн 100 мың көшет;
- 2023 жылы — 2440,1 гектарға 11 млн 248 мың көшет;
- 2024 жылы — 5139,0 гектарға 24 млн 462 мың көшет;
- 2025 жылы — 4900 гектарға 22 млн 988 мың көшет;
- 2026 жылы — 4000 гектарға 17 млн 276 мың көшет;
- 2027 жылы — 4150 гектарға 19 млн 418 мың көшет егіледі.
«Осы жылы жоспарға сәйкес мемлекеттік орман қоры алқабына 5139 гектар аумақта 24 млн 462 мың қарағай көшеті отырғызылды», — дейді Әсет Саинов.
Еске сала кетейік, Мемлекет басшысы Қасым-Жомарт Тоқаев Семей қаласы төңірегіндегі өртенген қарағайлы орманды қалпына келтіру жөніндегі жергілікті тұрғындардың бастамасын қолдаған еді.
Осыған орай биыл «Семей орманы» резерватына 29 млн-ға жуық көшет отырғызылатыны айтылды.
