Қазақстандық археологтер Павлодар облысынан сақ дәуіріне тиесілі қола пышақтар тапты

АСТАНА. KAZINFORM — Марғұлан университетінің археологтары мен студенттері Павлодар облысының Баянауыл ауданында сақ дәуіріне тиесілі екі қола пышақ тапты. Құнды жәдігерлер Торайғыр көлінің маңындағы қорғаннан жазғы далалық тәжірибе кезінде анықталды.

Археологиялық қорлардың бас сақтаушысы Елена Тушеваның айтуынша, бұл заттар «Торайғыр-6» ескерткішінде жүргізілген қазба жұмыстары барысында табылған. Сонымен қатар мамандар «Торайғыр-7» атты жаңа қорғанды да анықтаған.

– Біз екі қорғанды қазу кезінде сақ дәуірінің ерте кезеңіне жататын, қоладан құйылған пышақтар таптық. Бұл – Павлодар облысы үшін сирек кездесетін археологиялық олжа, – деді Елена Тушева.

Маманның мәлімдеуінше, пышақтар көне технология бойынша жасалғанымен, стилистикасы ерте темір дәуіріне жатады. Бұл – өңірде металлургиялық шеберлік пен мәдени байланыстардың жоғары деңгейде дамығанын көрсетеді.

Археологтар сондай-ақ бұл маңнан Тасмола мәдениетіне тиесілі адам қалдықтарын да анықтаған.

– Қаңқа сүйектер жақсы сақталған, бұл бізге жынысы, жасы және антропологиялық сипаттамаларын анықтауға мүмкіндік берді. Қабаттарды тереңірек тазалау барысында Андронов мәдениетіне жататын қабірлерді де таптық, – деді «Тарих» мамандығының студенті Ангелина Грищенко.

Айта кетейік, Марғұлан университеті Баянауыл аймағында археологиялық зерттеулерді он жылдан астам уақыт бойы жүйелі түрде жүргізіп келеді. Бүгінде оқу орны өңірдегі негізгі тарихи-мәдени мұра нысандарының сақталуына атсалысуда.

Бұған дейін алматылық археологтер сақ дәуіріне тиесілі алтын жүзік тапқан.