Қазақстандық әскери оркестр Мәскеуде өнер көрсетті

МӘСКЕУ.KAZINFORM - Қазақстан Республикасы Қарулы күштері Ұлттық әскери-патриоттық орталығының Орталық әскери оркестрі Қазақстан Конституциясының 30 жылдығы қарсаңында Мәскеуде өнер көрсетті, - деп хабарлайды Kazinform агенттігінің меншікті тілшісі.

Оркестр Ресей астанасындағы Чистопрудный бульварында, Абай ескерткішінің алдында концерт берді. Оркестрдің орындауында келесі шығармалар шырқалды: «Дос-Мұқасан» тобының әндерінен попурри, «Кудаша дикси», қазақ әндерінің әуендеріне арналған попурри, «Қазақ сувенирі», «Көзімнің қарасы», «Егемен Қазақстан» және тағы басқалары.

Оркестр құрамында 45 адам бар, олардың ішінде – 40 әскери музыкант, 1 әскери дирижер және Қазақстанның мемлекеттік туымен саптық қарауыл ротасының 4 ту ұстаушысы.

Айта кетейік, биыл Қазақстан Қарулы күштерінің Орталық әскери оркестріне 30 жыл толып отыр. Мәскеуде оркестр XVII Халықаралық әскери-музыкалық «Спасская башня» фестиваліне қатысып жатыр.

Аталған іс-шараға Ресейден, Азия, Африка және Еуропа елдерінен келген 25 ұжым да қатысып жатыр.

Айта кетейік, елордада мерзімді әскери қызметін аяқтаған сарбаздарға білім гранты табысталды.