Қазақстандық команда ойыншылары футзалдан Бразилия құрамасына шақыртылды
АСТАНА. KAZINFORM – Қазақстандық «Семей» клубының екі ойыншысы Габриэль Кандидо мен Педриньо Бразилия футзал құрамасына шақыру алды. Олар Германиямен жолдастық матчқа қатысады.
Бразилия футбол конфедерациясы жариялаған тізімде алты дүркін әлем чемпиондары құрамында қазақстандық клуб өкілдерінен бөлек Испания мен Португалияның топ клубтары, Ресей чемпионатының жетекші ойыншылары бар.
Бразилия құрамасының тізімі
Қақпашылар: Виллиан («Норильский никель», Ресей), Эспиндола («Хаэн», Испания).
Қорғаушылар: Уэсли («Спортинг», Португалия), Дейвао («Пальма», Испания), Жоао Салла («Хаэн», Испания).
Әмбебап ойыншылар: Пито («Барселона», Испания), Фабиньо, Эрнесто (екеуі де – «Пальма», Испания), Артур («Бенфика», Португалия),
Габриэль Кандидо, Педриньо (екеуі де – «Семей», Қазақстан).
Шабуылшылар: Руфино («Спортинг», Португалия), Чаруто («Пальма», Испания), Игор («Барселона», Испания). Бразилиялық ойыншылар Мюнхенде 9 желтоқсанда Германия құрамасымен шеберлік байқасады.
Айта кетсек, Қазақстан футбол құрамасының жаңа бас бапкері жақын арада тағайындалады.