Қазақстандық музыкант Түркия жұртшылығының ыстық ықыласына бөленді

Қазақстанға танымал виолончельшілердің бірі Бағжан Октябрь Түркияда камералық оркестрдің сүйемелдеуімен «Жан терапиясы» атты жеке концертін берді. Ол Түркияның 5 қаласына барды, деп хабарлайды Kazinform агенттігінің тілшісі.

Бағжан Октябрь әлеуметтік желідегі бейнебаяндары арқылы әлемнің көркем жерлерінде аспапта жанды әуен ойнап, танымал болды. Түркия жұртшылығы оны әйгілі түрік сериалдарындағы саундтректерді виолончельде орындағаны үшін ерекше жақсы көрді.

Музыканттың жеке концерті Түркияның бес қаласында өтті, олардың әрқайсысында зал адамға толы болды. Ол музыкалық бағдарламасын Ыстанбұл, Бурса, Анталия, Конья және Анкарада орындады.

«Жан терапиясы» концерттік бағдарламасы көрермендерге виолончельдің жанды да нәзік үнін естуге көмектесті. Көрермендер қазақтың халық шығармаларын ғана емес, әйгілі түрік фильмдерінің, телехикаяларының музыкасын, тамаша классика мен әлемдік хиттер тыңдады.
Әйгілі виолончельдің үнін тыңдауға жерлестер ғана келген жоқ. Аудиторияның көп бөлігін жергілікті түріктер құрады, олар Қазақстаннан келген таланттың әр шығармасына қызу қол соғып, қосыла шырқады.

Музыканттың айтуынша, барлық қалалардағы концерттер өзі ойлағандай өтіп, тіпті күткенінен де асып түсті.

«Барлығы мені қазақстандық музыкант ретінде таниды, мен көрермендер арасында отандастарымыз көп болады деп ойлаған едім. Алайда, көрермендердің 90 пайызына жуығы жергілікті тұрғындар болғаны мені қатты таңқалдырды», - деді Б.Октябрь.

Музыкант сондай-ақ Конья қаласында өткен концерті қатты есте қалатынын жеткізді. Себебі, ол бұл қалаға бұрын бармаған және көрермендерден не күтетінін білмеген.

Бағжан Октябрьді Анкарада музыкалық аспаптардың сүйемелдеуімен қазақтың халық әні «Ана туралы жырды» ерекше ықыласпен шырқайтын қазақ тыңдармандарының көптігі қатты қуантты.

Концертке келушілер музыканттың көрермендермен тамаша байланысын атап өтті, ол өзі бүкіл концерттік бағдарламаны қазақ, түрік және орыс тілдерінде жүргізді. Түрік көрермендеріне әртістің образындағы керемет өзгерістер, сондай-ақ залдағы атмосфераны ерекше көңілді еткен өмірден алынған әзілдері қатты ұнады.

Музыканттың барлық концерттері оркестр орындауындағы вальс әуенімен аяқталды.