Қазақстандық отбасы Газа секторынан эвакуацияланды

АСТАНА. KAZINFORM — ҚР Сыртқы істер министрлігінің үйлестіруімен және Иордания мен Израильдегі Қазақстан елшіліктерінің көмегімен Газа секторынан еліміздің алты азаматы эвакуацияланды, деп хабарлайды СІМ баспасөз қызметі.

Отандастарымыз шекаралық өткізу бекеттері арқылы өтіп, Амман қаласындағы Әлия патшайым атындағы халықаралық әуежайға жеткізілді. Кейін олар Қазақстанға оралды.

СІМ мәліметінше, бұл операция Иордания билігімен сындарлы өзара іс-қимылдың нәтижесінде жүзеге асты және шетелдегі азаматтардың құқықтары мен қауіпсіздігін қорғау – министрліктің басым бағыттарының бірі екендігін көрсетеді.

- ҚР-ның Амман мен Тель-Авивтегі дипломатиялық өкілдіктері өңірдегі жағдайды мұқият бақылап, Газа секторы мен Палестинада жүрген азаматтармен тұрақты байланыс орнатып отыр, - делінген ақпаратта.

Сыртқы істер министрлігі Иордания мен Израиль билігіне, сондай-ақ Халықаралық Қызыл Крест комитетіне көрсеткен қолдауы үшін алғыс білдірді.

Айта кетейік, тығырыққа тірелген Газада тәртіпсіздік белең ала бастады.