Қазақстандық балуан еркін күрестен әлем кубогінің қола жүлдегері атанды
АСТАНА. ҚазАқпарат – Қазақстандық балуан Азамат Дәулетбеков АҚШ-тың Айова штатындағы Коралвилл қаласында еркін күрестен өткен әлем кубогі жарысында қола жүлдегер атанды, деп хабарлайды ҚазАқпарат тілшісі.
«Спортты дамыту дирекциясы» РМҚК-дан мәлім еткеніндей, Азамат 86 келіге дейінгі салмақта әлем құрамасы сапында кілемге шықты.
Әлем құрамасы бәсекені екінші айналымнан бастады. Онда А.Дәулетбеков жапониялық Тацуия Шираиды 9:1 есебімен тізе бүктірді. Дегенмен жартылай финалда ирандық Әлиреза Мұхаммед Каримимачианиге жол берді.
Азамат қола жүлде үшін белдесуде грузиялық Сандро Аминашвилиді 8:2 есебімен ұтып, үздік үштікке ілікті.
Еске сала кетейік, бұдан бұрын үстел теннисінен Алан Құрманғалиевтің әлем чемпионатында алтынға қоса қола медаль жеңіп алғанын жазған болатынбыз.
Фото: www.instagram.com/drs_kz
