Қазақстандық боксшы Бахтияр Эюбов жеңіліп көрмеген америкалықпен айқасады
АСТАНА. ҚазАқпарат - Қазақстандық боксшы Бахтияр Эюбовтың (13-0, 11 КО) келесі қарсыласы анықталды, деп хабарлайды Sports.kz.
Ол осы уақытқа дейін ешкімнен жеңіліп көрмеген 23 жастағы америкалық Сонни Фредриксон (17-0, 11 КО).
10 раундтан тұратын жекпе-жек 4 тамыз күні Детройтте (АҚШ) бірінші орта салмақта өтеді деп жоспарланып отыр.
Кештің басты оқиғасы америкалық Кларесса Шилдс пен неміс Никки Адлердің WBC және IBF нұсқалары бойынша екінші орта салмақтағы әлем чемпионы титулы үшін өтетін жекпе-жегі болмақ.
