Қазақстандық «КВН»-шылар Сочидегі «КиВиН-2015» халықаралық фестиваліне қатысады

АСТАНА. ҚазАқпарат - Сочиде көңілділер мен тапқырлар клубы командаларының «КиВиН-2015» атты XXVI халықаралық фестивалі ашылуда. Биыл байқауды өткізу және лауреаттардың гала-концертін телевизиялық жазу орны ретінде шипажайдың басты сахнасы - Қысқы театр емес, «Горки Город» тау шаңғысы шипажайы алынды.

Қысқы сайысқа қатысу ниетін Ресей, Армения, Беларусь, Ұлыбритания, Грузия, Қазақстан, Қырғызстан, Латвия, Молдова, Тәжікстан және Украина елдерінің 540-тан астам командасы білдірді.

26-шы КВН қысқы жиыны Сочидегі тау шаңғысы шипажайларына келген қарапайым адамдар үшін де толық қолжетімді болады.

«Биылғы жылы алғаш рет КВН ойындарын ұнататындар фестивальге туристік жолдама алу мүмкіндігіне ие болады. Тау шаңғысы спортын сүйетіндер КВН ойыншыларымен бірге фестивальдің толыққанды қатысушыларына айналып, арнайы бейдждер алады, фестивальдің барлық шараларына, көріністері мен телевизиялық түсірілімдеріне еркін қатыса алады. Барлық қатысушыларға тамақтану үшін арнайы бағалар, ски-пасс және құралдарды жалға алу үшін жеңілдіктер ұсынылады», - деп хабарлады «КиВиН-2015» фестивалін ұйымдастыру комитетінен.

Фестивальдің байқау бағдарламасы 13 қаңтар күні командалардың өнерін тамашалау кезеңімен басталады. Қатысушыларды аймақтық лигалардағы рейтингтердің барлық түрлері, КВН Халықаралық одағының ресми лигаларына іріктеу үшін таласқа түсу, редакторлар мен тілшілердің мектеп-семинарларына қатысу, КВН одағының президенті Александр Масляковпен дәстүрлі басқосу шаралары күтіп отыр. «КиВиН-2015» фестивалі 24 қаңтарда аяқталады. Бұл күні финалдық шоу түсіріледі. Ұйымдастырушылар оның жаңа форматта өтетінін атап өтті, деп хабарлайды ТАСС.