Қазақстандық теннисші АҚШ-тағы турнирдің жеңімпазы атанды

НҰР-СҰЛТАН. ҚазАқпарат – Қазақстандық Анна Данилина жұптық сында АҚШ-тағы ITF сериясындағы W60 Charlottesville турнирінің жеңімпазы атанды, деп хабарлайды ҚазАқпарат тілшісі.

Доданың 1-ракеткалары болып тіркелген А.Данилина аустралиялық Арина Родионовамен бірге жарыс барысында барлық кездесуінде де жеңіске жетті.

Финалда қазақстандық-аустралиялық жұп жаңазеландиялық Эрин Рутлиф – индонезиялық Алдила Сутджиадимен бас жүлдені сарапқа салды.

А.Данилина мен А.Родионова 1 сағаттан сәл астам уақытқа созылған матчта қарсыластарын 6:1, 6:3 есебімен ұтты.

Бұл – қазақстандық теннисшінің жұптық сындағы биылғы екінші табысы.

Еске сала кетейік, бұдан бұрын Елена Рыбакинаның Мадрид турнирін жеңіспен бастағанын, қазақстандық жасөспірім теннисшінің Черногорияда жеңімпаз атанғанын жазған болатынбыз.

Сондай-ақ Александр Бубликтің Мадрид мастерс турниріндегі қарсыласы анықталды.