Қазақстандық теннисші Чехиядағы турнирді жеңіспен бастады
Әлемнің 169-ракеткасы Д.Попко бастапқы кездесуін дүниежүзілік рейтингте 188-орында тұрған аустриялық Себастиан Офнермен өткізді.
Бірінші партияда тай-брейкте қазақстандық теннисші сәтті ойнады – 7:6 (7:5).
Екінші сетте С.Офнер есе қайырды – 6:3.
Үшінші, шешуші партияда Д.Попко жеңісті жұлып алды – 6:4.
Екі сағат жарымға жуық уақытқа созылған матч барысында Д.Попко 7 эйспен бірге 11 брейк-пойнттың төртеуін құр жіберген жоқ.
Д.Попко жарыстың ширек финалына шығу үшін рейтингте 272-сатыдағы чехиялық Йонас Форейтекпен таласады.
Тағы бір қазақстандық, әлемнің 345-ракеткасы Денис Евсеев те Рим челленджер турнирінің екінші айналымына шықты.
Жарысты іріктеу сайыстарынан бастаған Д.Евсеев алғашқы айналымда әлемнің 160-ракеткасы, италиялық Алессандро Джанессимен шеберлік байқасты. Есеп 7:6 (7:5), 3:2 болған мезетте қазақстандық теннисшінің қарсыласы матчты жалғастырудан бас тартты.
Д.Евсеев ширек финалға шығу үшін тағы бір италиялық, рейтингте 178-орындағы Джанмарко Морони сынға түседі.
Еске сала кетейік, бұдан бұрын Қазақстан құрамасының Дэвис кубогындағы қарсыластары анықталғанын жазған болатынбыз.
Сондай-ақ Қазақстан жасөспірімдер құрамасы ӘЧ іріктеу кезеңінің ширек финалына шықты.