Қазақстандық теннисші Франциядағы турнирдің ширек финалына шықты

НҰР-СҰЛТАН. ҚазАқпарат – Қазақстандық Григорий Ломакин жұптық сында Блуа (Франция) челленджер турнирінің ширек финалына шықты, деп хабарлайды ҚазАқпарат тілшісі.

Г.Ломакин украиналық Владислав Манафовпен бірге бастапқы кездесуін осы жарыстың бірінші ракеткалары, аустриялық Александр Эрлер – франциялық Альбано Оливеттимен өткізді.

Қазақстандық-украиналық жұп екі сағатқа жуық уақытқа созылған матчта 7:6 (7:5), 6:7 (4:7), 10:5 есебімен жеңіске жетті.

Г.Ломакин мен В.Манафов жартылай финалға шығу үшін үндістандықтар Шрирамбалай Нараянасвами – Дживан Недунчежиянмен таласады.

Тағы бір қазақстандық Тимофей Скатов жекелей сында екінші айналымда үш сағатқа жуық созылған кездесуде әлемнің 184-інші, осы доданың 7-ракеткасы, сербиялық Никола Милоевичке қатты қарсылық көрсетіп, 6:4, 4:6, 4:6 есебімен жол берді. Сөйтіп ол ширек финалға шыға алмай қалды.

Қазақстанның бірінші, әлемнің 37-ракеткасы Александр Бублик Лондон ATP 500 турнирінің ширек финалына өте алмады. Екінші айналымда әлемнің 17-ракеткасы, хорватиялық Марин Чиличпен кездескен ол бірінші партияда тай-брейкте 5:0 есебімен алда тұрып, сол мүмкіндігін пайдалана алмады. Ақыры 6:7 (6:8), 5:7 есебімен жеңіліп қалды.

Еске сала кетейік, бұдан бұрын қазақстандық теннисшінің Испаниядағы жарыстың жартылай финалына өткенін жазған болатынбыз.