Қазақстандықтар Түркия халқына көмек ретінде 5 млн доллар жинады
АСТАНА. ҚазАқпарат – Қазақстандықтар зілзаладан зардап шеккен Түркия халқына көмек көрсету үшін 5 млн доллар жинады. Бұл туралы елшілікте өткен брифингіде Түркия Республикасының Қазақстандағы Төтенше және өкілетті елшісі Уфук Екиджи айтты, деп хабарлайды ҚазАқпарат тілшісі.
«Заттай көмектен бөлек, Қазақстан тұрғындары ақшалай көмек көрсетті. Осы уақытқа дейін жер сілкінісінен зардап шеккендерге арнайы ашылған ресми шотқа шамамен 5 млн доллар ақша түсті», - деді Уфук Екиджи.
Сонымен қоса, елші Қазақстан Үкіметі 1 млн доллар қаржылай қолдау көрсеткенін атап өтіп, барша қазақстандықтарға алғысын білдірді.
Еске салайық, 6 ақпанда Кахраманмарашта магнитудасы 7 балдан асатын екі жер сілкінісі болды. Жерасты дүмпулері елдің 10 провинциясында, сондай-ақ көршілес мемлекеттерде, соның ішінде Сирияда да сезілді.
Президент Режеп Тайып Ердоған табиғи апат құрбандарына байланысты Түркияда жеті күндік ұлттық аза тұту жариялады.
