Қазақстанға Бенин Республикасының Сыртқы істер министрі келді
АСТАНА. KAZINFORM – Қазақстанға Бенин Республикасының Сыртқы істер министрі Олушегун Аджади Бакари келді.
Айта кетейік, Қазақстан мен Бенин Республикасы арасындағы дипломатиялық қарым-қатынас 2011 жылы 13 қыркүйекте басталды.
Жоғары мәртебелі министр мырза, құрметті делегация мүшелері, Қазақстанға қош келдіңіздер!. Мен бүгінгі тарихтағы алғашқы сапарыңызды екі елдің ынтымақтастығын нығайтуға бағытталған маңызды қадам деп қарастырамын. Бұл басқосудың мән-маңызы зор. Сіздің сапарыңыз екі ел арасындағы қарым-қатынасты дамытуға тың серпін берері сөзсіз, - деді ҚР Премьер-министрінің орынбасары – Сыртқы істер министрі Мұрат Нұртілеу мәртебелі мейманмен кездесу барысында.
Қазақстанға сапары барысында Бенин Республикасының Сыртқы істер министрі бірқатар өндіріс орнының жұмысымен танысады.
- Қол жеткізілетін барлық уағдаластық Қазақстан-Бенин ынтымақтастығын нығайта түсуге ықпал ететініне кәміл сенемін, - деп толықтырды СІМ басшысы.
Өз кезегінде Бенин Республикасының Сыртқы істер министрі Олушегун Аджади Бакари Қазақстанға келгенін құрмет тұтатынын айтты.
- Бүгін Қазақстан Республикасының астанасы Астана қаласында болу – мен үшін үлкен құрмет. Өз командамның атынан бізге көрсетілген алғашқы күннен бастап жылы қабылдауыңыз үшін алғыс білдіргім келеді. Бұл біздің қарым-қатынасымыздың дамып келе жатқандығының айғағы, - деді мәртебелі мейман.
Одан әрі Олушегун Аджади Бакари Қазақстанға келудегі мақсатын айтты.
- Біздің Қазақстанға келудегі мақсат – екіжақты қарым-қатынастың дамуына серпін беру. Мен Қазақстан туралы көп естідім және бүгін осы жерде болу, елдің жетістігі мен табысын өз көзіммен көру мен үшін зор қуаныш. Бұл – Қазақстан Республикасы Президенті мен Үкіметінің табысты жұмысының нәтижесі. Осы жетістікпен сіздерді және бүкіл Қазақстан халқын шын жүректен құттықтаймын, - дейді Бенин елінің сыртқы істер министрі.
Еске салайық, биыл 10 қаңтарда Президент дипломатиялық қызметке қатысты заңға қол қойды.
Сондай-ақ Kazinform агенттігінің халықаралық шолушысы Қазақстанның бүгінгі дипломатиясының ерекшеліктеріне талдау жасаған еді.
