Қазақстанның 19 жастағы футболшысы ҚПЛ-дың ең қымбат ойыншысына айналды
АСТАНА. KAZINFORM — 19 жастағы «Ордабасы» клубы мен Қазақстан құрамасының жартылай қорғаушысы Жасұлан Әмір Қазақстан Премьер-лигасындағы ең қымбат футболшылар рейтингінде көш бастады. Бұл туралы Transfermarkt порталы ойыншылардың нарықтық құнын жаңартқаннан кейін белгілі болды.
Жасұлан Әмірдің трансферлік құны 500 мың еуродан 2,5 миллион еуроға дейін өсті. Осылайша, футболшының нарықтық бағасы бір жаңартудың өзінде бес есе артып, 2 миллион еуроға қымбаттады.
Рейтингтің бірінші сатысын ол «Астана» клубының жартылай қорғаушысы Иван Башичпен бөлісті. Босниялық футболшының да трансферлік құны 1 миллион еуроға өсіп, 2,5 миллион еуроға жетті.
Одан кейін «Қайрат» қақпашысы Темірлан Анарбеков пен «Ордабасы» қорғаушысы Ги-Марселен Килама орналасқан. Екеуінің де нарықтық құны 1,2 миллион еуроға бағаланып отыр.
Ал «Астана» сапындағы Мақсат Абраев, «Ордабасы» ойыншысы Давид Абағна, «Қайрат» футболшысы Жоржиньо және «Ақтөбе» өкілі Пабло Альварестің құны 1 миллион еуродан.
Тағы бес футболшының нарықтық бағасы 900 мың еуроны құрады. Олар – «Ордабасы» ойыншылары Елхан Астанов пен Алекса Аманович, «Ақтөбе» сапындағы Артур Шушеначев пен Даниэль Соса, сондай-ақ «Тобыл» футболшысы Виталий Лисакович.
Айта кетейік, осы маусымда шымкенттік «Ордабасы» ҚПЛ чемпионы атанды.