Қазақстанның авиациялық әкімшілігіне неге кіл шетелдік мамандар басшы болады
АСТАНА. KAZINFORM — Не себепті «Қазақстанның авиациялық әкімшілігі» компаниясын басқару қызметі шетелдік мамандарға беріліп келе жатқаны мәлім болды.
Қазіргі таңда «Қазақстанның авиациялық әкімшілігі» АҚ басшысы — румыниялық топ-менеджер Каталин Раду. 2019 жылдан 2022 жылға дейін оны ағылшын Питер Гриффитс басқарған. Питер Гриффитс өз еркімен жұмыстан кеткен кезде оның міндетін уақытша атқарған орынбасары Линда Орлэди де шетелдік маман. Басшылық қызметке шетелдік мамандардың жиі тартылуы елімізде авиациялық басқару саласында білікті мамандар тапшылығын білдіре ме? Не себепті өзге елдерден басшы мамандар тартылады? Kazinform агенттігі осы сауалдарды ҚР Көлік министрлігіне жолдаған еді.
— 2019 жылы «Қазақстанның авиациялық әкімшілігі» АҚ 100% мемлекеттің қатысуымен құрылды. Ұйымның негізгі функциялары — ұшу қауіпсіздігі мен авиациялық қауіпсіздік саласындағы техникалық бақылау және қадағалау. Қызметкерлерге жетекші халықаралық авиациялық ұйымдармен салыстыруға болатын тиісті еңбек жағдайлары жасалды. Нәтижесінде саланы табысты дамыту үшін жоғары білікті шетелдік сарапшыларды тарту мүмкіндігі бары анықталды. Кәсіпорынды тиімді басқару мақсатында азаматтық авиация саласында озық халықаралық ұйымдарда жұмыс тәжірибесі бар шетелдік мамандар тартылады. Құзыретті шетелдік мамандарды тарту жалпы әлемдік тәжірибе саналады (Сингапур, БАӘ және т. б.). Мұндай мамандар жергілікті мамандар арасынан жаңа кадрлардың қалыптасуына оң ықпал етіп, тәжірибе алмасуға атсалысуда. Аталған модель жетекші еуропалық елдер мен британдық авиация органдарына ұқсас, — деп жазылған ведомствоның ресми жауабында.
Министрлік қабылданған шаралар бақылау мен қадағалаудың тиімділігін арттыруға, Қазақстанның азаматтық авиациясының халықаралық аренадағы имиджін жақсартуға мүмкіндік беретінін атап өткен.
— Халықаралық азаматтық авиация ұйымы (ИКАО) және Еуропалық комиссия Қазақстанның жаңа модельді енгізу бойынша жұмысында ілгерілеу барын атап өтті. 2021 жылғы 2-11 тамыз аралығында ИКАО-ның Үйлестірілген валидациялық миссиясы (ICVM) шеңберінде ИКАО аудиторларының саланы тәуелсіз тексеруі жүргізілді. Онда Қазақстан ұшу қауіпсіздігін қамтамасыз ету деңгейін 74%-дан 82%-ға дейін арттырғаны анықталды (салыстыру үшін: Германия — 93%, Ұлыбритания — 93%, Дания — 84%, Польша — 82%, Әзербайжан — 79%, Ресей — 69%, Өзбекстан — 59%, орташа, әлемде — 67%, орташа, Еуропа — 77%), — делінген хабарламада.
Айта кетейік, бұған дейін Нұртөре Жүсіп өзінің депутаттық сауалында Үкіметке азаматтық авиацияның негізгі проблемаларын атап көрсеткен еді.
Сонымен қатар, елімізде азаматтық авиацияны дамыту стратегиясы қашан құрылатыны белгілі болды.
Бұдан бөлек, Азаматтық авиация академиясына ерекше мәртебе берілетіні айтылды.
