Қазақстанның IT жобасы халықаралық байқауда жеңіске жетті
АСТАНА. KAZINFORM – Президент іс басқармасының инженерлік-техникалық орталығы WSIS Prizes 2025 байқауында жеңіске жетті.
Бұл әлемге әйгілі цифрлық конкурс. Жерлестеріміз өз номинациясында топ 5 команда ішінде 2 миллион дауыс жинап, «Ситуациялық-сараптамалық кешен» жобасымен үздік деп танылды.
Женевада өткен WSIS+20 салтанатты рәсімінде әлемдегі ең ірі цифрлық байқаулардың жеңімпаздары жарияланды. Марапатты ЭХО Бас хатшысы Дорин Богдан-Мартин мемлекеттер мен халықаралық ұйымдар өкілдері қатысып, өзі табыстады.
Президент Іс басқармасының Инженерлік-техникалық орталығы әзірлеген САК жобасы — мемлекеттік сектордағы деректерді талдауға, мониторинг жүргізуге және жедел басқаруға арналған инновациялық цифрлық платформа. Бұл платформа еліміздің 20 өңірін қамти отырып, Қазақстан бойынша әлеуметтік-экономикалық дамудың түрлі бағыттары бойынша 500-ден астам көрсеткішті қамтиды.
— Бұл жеңіс — еліміздің цифрлық дамуының халықаралық деңгейде мойындалуы. Қазақстан жоғары технологиялық әлеуетке ие екенін көрсетіп, әлемдік трендтерді қуып қана қоймай, маңызды цифрлық шешімдерді ұсынып, оларды жаһандық деңгейде дамытуға үлес қоса алатынын дәлелдеді, — деді ПІБ ИТО басшысы Дәурен Нұрәлиев.
Қазақстанмен бірге бұл номинация бойынша финалға Өзбекстан, Руанда, Мексика және Біріккен Араб Әмірліктерінің жобалары да өтті.
Айта кетейік, 2027 жылдың соңына дейін байланыс операторлары 5G технологиясын дамытуға 450 миллиард теңге инвестиция салады.
