Қазақстанның канадалық уран компаниясының алдында ешқандай міндеттемесі жоқ – Әділет министрлігі

АСТАНА. KAZINFORM – Қазақстанның канадалық «World Wide Minerals»  уран компаниясының алдында ешқандай міндеттемесі жоқ. Бұл туралы Орталық коммуникациялар қызметіндегі брифингте Әділет министрлігінің ресми өкілі Талғат Уәли айтты.

- 2025 жылғы 28 Ақпанда «World Wide Minerals» канадалық уран компаниясының Қазақстан Республикасына қарсы талап қоюы бойынша 2013 жылдан бері жалғасып келе жатқан дау нәтижесінде Лондонның Жоғарғы Соты Қазақстан Республикасы үшін оң шешім шығарды. Ол бойынша республика талап иелеріне шамамен 65 млн АҚШ долларын төлеуге тиіс болатын 2024 жылғы қабылданған шешімнің күші жойылды, - деді Талғат Уәли.

Оның атап өтуінше, WWM талаптары ҚР Үкіметінің 1997 жылы уран экспортына лицензия беруден бас тартуына және Тың тау-кен химия комбинатын (Қазіргі Степногорск тау-химия комбинаты) сенімгерлік басқару келісімшартын бұзуына негізделді.

- 2025 жылғы шешімге сәйкес Қазақстан Республикасының WWM алдында ешқандай міндеттемесі жоқ. Айта кету керек, ағылшын сотында шағымдану стандарттары өте жоғары және осы негіздегі даулардың 2 пайыздан азы ғана қайта қаралып кері шешім шығарылады. Осылайша, Әділет министрлігінің, мемлекеттік органдардың және Үкімет консультантының үйлесімді жұмысының арқасында елеулі бюджет қаражатын үнемдеуге, сондай-ақ елдегі инвестициялық ахуалдың тартымдылығын және Қазақстан Республикасының халықаралық аренадағы имиджін сақтауға мүмкіндік туды, - деді ол.

2020 жылы 23 қарашада Англияның Жоғары соты Қазақстан Республикасына қарсы «World Wide Minerals» канадалық компанияның және Пол А.Кэроллдың талабы бойынша осыдан бұрын шығарылған төрелік шешімнің (соның ішінде залал, пайыздар және сомалар бойынша мәніне қатысты) күшін жойған еді.