Қазақтелеком интернеті не себепті уақытша істемей қалғаны айтылды

АСТАНА. KAZINFORM — 1 сәуірде «Қазақтелеком» ұлттық телекоммуникациялық компаниясының интернетінен ақау шықты.

Бұл ақпаратты аталған компанияның баспасөз қызметі растады.

— 1 сәуір күні сағат 15:59–да интернетке қолжетімділікте уақытша қиындық туындады. Желіге қолжетімділік дереу қалпына келтірілді, — деген жауап алдық компанияның баспасөз қызметінен.

Ақпаратта айтылғандай, қазір интернет тұрақты жұмыс істеп тұр. 

Айта кетсек, жыл басында қазақстандықтар бірқатар сервиске, оның ішінде egov.kz мемлекеттік ресурсын ашу кезінде қиындықтарға тап болған еді. Артынша «Қазақтелеком» АҚ осы жағдайға түсініктеме берді. 

Сондай-ақ еліміздің интернет жылдамдығы бойынша әлемдік рейтингтегі көрсеткішінің жоғарылағаны туралы жазған болатынбыз.

Еске сала кетсек, былтыр Телекоммуникациялар комитеті байланыс операторларына қатысты 357 тексеру жүргізді. Нәтижесінде, 1 млрд 184 млн теңге көлемінде айыппұл салынды.