«Қазатомпром» компаниясында аптасына 400 мың жалақы алуға болады — фейк

АСТАНА. KAZINFORM — Ғаламторда «Қазатомөнеркәсіп» ұлттық атом компаниясы атынан тез әрі оңай табыс табу туралы жалған ақпарат тарады. Айтуларынша, қазақстандықтар жасына қарай аптасына 400 мың теңгеден табыс таба алады. Бұл жалған ақпарат, деп жазды Stopfake.kz. 

Желіге жалған ақпарат таратқан қаскөйлер тек мәтінмен шектелген жоқ. Олар белгілі қазақстандық саясаттанушы Санжар Боқаев ұлттық компанияның бағдарламасы туралы айтып жатқан видеоны монтаждаған. Дыбысы жалған. Видеоға негіз ретінде Санжар Боқаевтың TikTok желісіндегі ресми парақшасындағы бейнені алған.

Ақпан айында жарияланған видеода ол республика халқының қарыз ауыртпалығын талқылайды. Алаяқтар қажетті фрагментті кесіп алып, жалған дауыс қосқан.

«Қазатомөнеркәсіп» ҰАК» АҚ ресми сайтында да, Instagram және Facebook әлеуметтік желілеріндегі компанияның парақшаларында да аптасына 400 мың теңгеден түсетін табыс туралы хабарламалар жоқ.

— Жарнамадағы алаяқтар қандай төлем қажет екенін білу үшін сілтемелерге өтуді ұсынады. Егер ақшаңыздан айырылығыңыз келмесе, бұл әрекетке бармаңыз. Жоғары табысты жобаларға қатысты кез келген ақпаратты сыни тұрғыдан бағалап, тек компаниялардың ресми веб-сайттарына және олардың әлеуметтік желілердегі аккаунттарына кірген жөн, — делінген хабарламада.

Бұған дейін хабарланғандай, елімізде дипфейктер үшін қылмыстық жауапкершілік енгізілуі мүмкін.