«ҚазЭкспортКепіл» экспорттық-несие» акционерлік қоғамына 6 миллиард теңге көлемінде қаржы бөлінді

АСТАНА. 27 желтоқсан. ҚазАқпарат /Айдар Оспаналиев/ - «Қазақстан экономикасының бәсекеге қабілеттілігін және тұрақтылығын қамтамасыз ету мақсатында ел үкіметі «ҚазЭкспортКепіл» экспорттық-несие» акционерлік қоғамына «Локомотив құрастыру зауыты» акционерлік қоғамының тасымалдарын сақтандыру мен қаржыландыру үшін займ ретінде 6 миллиард теңге көлемінде қаржы бөлді»,-

деп хабарлайды «ҚазЭкспортКепіл» экспорттық-несие» акционерлік қоғамының баспасөз қызметі.

Баспасөз мәліметтеріне қарағанда, биылғы жылдың өзінде-ақ мемлекеттің қолдауымен екі локомотив Тәжікстан Республикасына сатылған. Болашақта отандық локомотивтерді басқа да мемлекеттерге сату көзделіп отыр. Осы уақытта қазақстандық локомотивтерге қызығушылық танытып отырған Моңғолиямен келіссөздер жүргізілуде. Осы ретте «ҚазЭкспортКепіл» компаниясының мемлекеттің қолдауымен шикізаттық емес экспорттың көлемін арттыру мен экономиканы диверсификациялау бойынша тиісті шаралар қолданып отырғандығын атап өту керек. Осы бағытта 2010-2014 жылдарды қамтитын Мемлекеттік үдемелі индустриялық-инновациялық даму бағдарламасының арқасында «Сауданы қаржыландыру» шарасы сәтімен жүзеге асырылуда. Бүгінгі күнде аталмыш бағдарлама аясында құны 2,5 миллиард теңгені құрайтын 70-тен астам жобаларға қолдау көрсетілді. Қолдау көрсетілген бағдарламалардың арасында отандық ұнды, құрылыс материалдарын, химия саласындағы тауарларды тасымалдау сияқты жобалар бар. Сонымен қатар шикізаттық емес отандық тауарды экспорттаудың географиясы да кеңейіп, олар бүгінде Тәжікстан, Беларусь, Грузия, Өзбекстан, Ауғанстан сияқты елдерге де жеткізілуде.