Қазығұрттық жастар 1768 метрлік шыңға шығып, Мемлекеттік Ту тікті

ТҮРКІСТАН. KAZINFORM - 4 маусым – Қазақстан Республикасының Мемлекеттік рәміздер күніне орай Қазығұрт ауданында жастардың қатысуымен ерекше патриоттық акция өтті.

Жастар қасиетті Қазығұрт тауының шыңына шығып, еліміздің Мемлекеттік Туын тікті. Бұл тау теңіз деңгейінен 1768 метр биіктікте орналасқан. Ұзындығы – 22, ені – 10 шақырымды құрайды.

Шыңға көтерілген соң, қатысушылар Мемлекеттік рәміздер туралы баяндама тыңдады. Ел тарихы мен тәуелсіздік жолындағы жетістіктерді еске алды. Әнұранды бірге орындап, естелік фотосессия жасады.

Іс-шараны аудандық «Жастар ресурстық орталығы» ұйымдастырды. Басты мақсат – жастар арасында Отанға деген сүйіспеншілікті арттыру, Мемлекеттік рәміздерге деген құрметті қалыптастыру, салауатты өмір салтын насихаттау.

Ұйымдастырушылардың айтуынша, мұндай шаралар жастардың бойындағы рухани-азаматтық сананы қалыптастыруда, елге деген адалдық пен белсенділікке тәрбиелеуде маңызды рөл атқарады.

Айта кетейік, бұдан бұрын Түркістан облысындағы Келес ауданының тұрғыны Еуропадағы беделді оқу орындарынан шақырту алғанын жазған болатынбыз.