Қазіргі таңда АӨІСШК ұйымы Азиялық ЕҚЫҰ-ға айналып отыр

АСТАНА. Мамырдың 1-і. ҚазАқпарат /Қанат Мәметқазыұлы/ - Қазіргі таңда АӨІСШК ұйымы Азиялық ЕҚЫҰ-ға айналып отыр. Бүгін елордада өтіп жатқан Азиядағы өзара іс-қимыл және сенім шаралары кеңесіне мүше мемлекеттердің этномәдени бірлестіктерінің форумы барысында сөз сөйлеген Қазақстан халқы Ассамблеясы төрағасының орынбасары Ералы Тоғжанов осылай мәлім етті,

деп хабарлайды ҚақАқпарат. Жиын барысында Қазақстан Президентінің Азиядағы қауіпсіздікті сақтауға бағытталған бастамаларына тоқтала келе Е. Тоғжанов, форумды қалыптастыру нақты институтқа айналғанын, дипломатияның озық үлгісін жүзеге асырғанын атап өтті. Оның айтуынша, АӨІСШК Азияда орын алған түрлі қақтығыстар мен проблемаларды шешуде өзара нұсқаларды өмірге келтірген беделді ұйымға айналып келеді. Бүгінде 40 млн. шаршыметр аумақты қамтитын, 3 млрд.-тан астам адам өмір сүретін 20 мемлекет бір мақсатқа, диалог пен ынтымақтастық арқылы қауіпсіздікті қамтамасыз етуге жұмылып отыр. Осы мемлекеттердің жиынтық ішкі жалпы өнімі әлемдік экономиканың 40 пайызын құрайды. «Бүгінгі күні АӨІСШК Азиялық ЕҚЫҰ-ға айналып отыр. Ұйым, Давос форумында Елбасы Н. Назарбаевтың айтқанындай - Азиялық Жиырмалық (А-20) алаңына ұласты», деді Е. Тоғжанов. Оның айтуынша, Азия мемлекеттерінің күшін жұмылдыратын негізгі бағыттардың бірі - гуманитарлық сала болып табылады. Бұл бағыттағы жауапкершілік Қазақстанға жүктелген. Сондықтан да, бұл мәселеде мәдениеттердің жақындасуы басты біріктіретін фактор екендігін айқан Е. Тоғжанов, халықтардың бейбітшілік пен қауіпсіздік үшін бірлесуіне ешнәрсе кедергі бола алмайтынын жеткізді. «Қазіргі ғаламдану әлемі бұл мәміленің, өзара сенімнің рөл ойнайтын дәуірі. Тек қана Еуропалық қауіпсіздік болмайтыны секілді, Азиялық та қауіпсіздік болмайды. Яғни, жалпыадамзаттық рухани құндылықтар мен мәдениаралық диалогтар арқылы жалпыадамзаттық қауіпсіздік қамтамасыз етіледі», деді Ассамблея төрағасының орынбасары.