Қазіргі уақытта 186 өңірлік инвестициялық жоба мониторингпен қамтылған

АСТАНА. Сәуірдің 30-ы. ҚазАқпарат /Ернұр Ақанбай/ - Индустрия және сауда министрлігі қазіргі уақытта инвестициясының жалпы көлемі 2,5 трлн. теңге немесе 16,6 млрд. доллар болатын 186 өңірлік инвестициялық жобаға мониторинг жасап отыр.Бұл туралы бүгін Үкімет отырысында министр Владимир Школьник айтты,

деп хабарлайды ҚазАқпарат. Оның сөзіне қарағанда, бұл жобаларды 2009-2015 жылдары іске асыру көзделуде. Олардың «Қазақстанның 30 корпоративтік көшбасшысы» бағдарламасындағы және ауыл шаруашылығы саласындағы жобаларға қатысы жоқ. Жоғарыдағы 186 инвестициялық жоба іске қосылатын болса 33 мыңдай жұмыс орны құрылатын болады. Олардың ішінде биыл 107 нысанды іске қосып, 11 мың 292 жұмыс орнын ашу көзделуде. «Қаржылық көздер бөлігіндегі жағдай мынадай: инвестициялық жобалардың басым бөлігі, яғни 44 пайызы негізінен несиелік ресурстар, ал 49 пайызы жеке қаржы есебінен қаржыландырылып жатыр. Қаржыландырудағы даму институттарының үлесі 2 пайызды, мемлекеттің үлесі 4 пайызды құрайды», - деді министр. Оның айтуынша, өңірлер бөлінісі бойынша Павлодар облысында - 34, Қостанай облысында - 26, Ақтөбе облысында 23 инвестициялық жобалар жүзеге асырылуда. Өңірлер бөлінісінде Атырау облысында 21 млрд. теңгенің инвестициялық жобалары қаржыландырылуда. Ал салалар бөлінісінде құрылыс материалдарын өндіретін металлургия өнеркәсібіндегі, инфрақұрылымдық салалардағы жобалар басымдыққа ие.