Қазір АҚШ-пен келісімге келудің ең қолайлы уақыты – Иран президенті
АСТАНА. KAZINFORM – Иран президенті Масуд Пезешкиан 8 тамыз, сенбі күні қазіргі кезеңді АҚШ-пен келісімге келудің «ең қолайлы уақыты» деп санайтынын мәлімдеді. Бұл туралы Анадолу агенттігі жазды.
– Адамдар келісімге келу туралы айтқанда, меніңше, қазір – ол үшін ең қолайлы уақыт. Өйткені елде ауызбіршілік, күш пен бірлік бар. Менің білуімше, Иран бұл соғыс пен қақтығыстан жеңімпаз әрі қуатты мемлекет ретінде шыққан ел саналады, – деді Масуд Пезешкиан президент қызметіне кіріскеннен бергі екінші баспасөз мәслихатында.
Ол қазіргі жағдай келісімге қол жеткізуге және шешілмеген мәселелерді диалог арқылы реттеуге мүмкіндік беретінін атап өтті.
ISNA жартылай ресми ақпарат агенттігінің хабарлауынша, Пезешкиан Иран өз құқықтарын диалог арқылы қорғай алатынын және ел мен халықтың мүддесінен басқа ештеңеге ұмтылмайтынын айтты.
Оның сөзінше, дауларды тек соғыс арқылы шешу мүмкін емес. Президент өз үкіметінің маусым айында АҚШ-пен қол қойылған өзара түсіністік туралы меморандум аясында бейбітшілік орнатуға бейілді екенін тағы да растады.
– Бұл мәселелерді тек соғыс арқылы шешу мүмкін емес. Біз меморандум ережелеріне сүйене отырып, бейбітшілікке қарай ұмтылғымыз келеді, – деді ол.
Пезешкианның айтуынша, егер АҚШ өзі қалыптастырған сенімсіздік ахуалынан бас тартып, өзара сенімді қалпына келтіру мүмкін болса, Тегеран меморандумды алдағы іс-қимылдың негізі ретінде пайдалануға ниетті. Сонымен қатар ол Иранның Вашингтонды әлі де «сенім артуға болмайтын» тарап деп санайтынын жеткізді.
ИРНА ресми ақпарат агенттігі жариялаған мәлімдемесінде Пезешкиан диалог Тегеранның Вашингтонға қатысты бұрыннан қалыптасқан ұстанымын өзгертпегенін айтты.
Сондай-ақ Иран президентінің пікірінше, дәл дипломатиялық қадамдар Вашингтонды Тегеранмен келіссөз жүргізуге мәжбүр еткен.
– Біздің келіссөз жүргізіп, дипломатияға жүгінуіміздің өзі АҚШ-ты келіссөз үстеліне отыруға және Иранмен келісім мен өзара түсіністікке қол жеткізуге мәжбүр етті, – деді Пезешкиан.
Ол меморандумға қатысты айтылған сындарды да жоққа шығарды. Президенттің сөзінше, құжатта Иранның қандай да бір мүддесінен немесе ұстанымынан бас тартуын талап ететін тармақ жоқ.
– Меморандумнан біздің қандай да бір мәселеде шегініс жасағанымызды көрсететін бірде-бір тармақ таба алмайсыз. Тегеран өзі қол қойған ұстанымында нық тұр, – деді ол.
Пезешкиан Вашингтонды меморандум талаптарын бұзды деп айыптады. Оның айтуынша, АҚШ Иран мен Оман бірлесіп келісуі тиіс рәсімдерді сақтаудың орнына Ормуз бұғазындағы кеме қатынасының балама схемаларын ұйымдастыруға ұмтылып отыр.
Ол ықтимал заң бұзушылықтарға қатысты даулар меморандумда қарастырылған тетіктер арқылы шешілуі тиіс екенін айтып, құжатты іске асыру процесі Иран үшін «абыроймен және құрметпен» жалғасатынына үміт білдірді.
Пезешкиан Иранның келіссөз жүргізуші делегациясын да қорғап, оның мүшелерін «өз ісіне берілген, білікті және еңбекқор» мамандар деп атады. Оның пікірінше, келіссөз жүргізушілерге бағытталған сын әділетсіз.
Сонымен қатар Иран президенті оның әкімшілігі интернетке қолжетімділікке қойылған шектеулерді жеңілдету бағытында биліктің үш тармағының басшыларымен және Ұлттық қауіпсіздік жоғары кеңесімен бірлесіп жұмыс істеп жатқанын хабарлады. Бұл ретте қауіпсіздік мәселелері мен инфрақұрылымның қазіргі жағдайы ескерілмек.
Айта кетейік, Ормуз бұғазындағы шиеленіс мұнай бағасының өсуіне әсер етті.
Ал АҚШ пен Иран текетіресі қалай өрбіп келе жатқанын мына жерден оқи аласыз.
