«Ордабасы» мен «Қызылжар» Қазақстан кубогының ширек финалына шықты

АСТАНА. KAZINFORM - «Ордабасы» мен «Қызылжар» футболдан Қазақстан кубогының ширек финалына жолдама алды. 

Бүгін шымкенттік «Ордабасы» сырт алаңда «Тараз» командасымен кездесті.

Бірінші лигада доп тебетін тараздық клубының футболшылары жақсы ойынымен көзге түсті. Негізінен жергілікті футболшылардан жасақталған ұжым «Ордабасының» тәжірибелі ойыншыларының емін-еркін көсілуіне мүмкіндік берген жоқ. Кейбір сәттерде гол соғуға жақын болды. Соған қарамастан шымкенттік команда сапынан Режиналду 36, Еркебұлан Тұңғышбаев 37-минутта гол соғып, командасын жеңіске жетеледі. Осылайша «Ордабасы» қарсыласын 2:0 есебімен жеңіп, ширек финалға шықты.

Тағы бір кездесуде Петропавлдың «Қызылжары» сырт алаңда Шымкенттің «Оңтүстік академия» клубымен шеберлік байқасты. Алаң иелері сапынан Диас Донбай 27-минутта гол соқса, петропавлдық клубтан Мәди Хасейін 70, Рубен Бриджидо 71-минутта көзге түсіп, командасын есепте алға шығарды. Қарсыласынан 2:1 есебімен басым түскен «Қызылжар» жарысты жалғастыруға мүмкіндік алды.

Еске салсақ, бұдан бұрын Қазақстан кубогы аясында «Тобыл» «Қайсарды», «Қайрат» «Тұранды» 3:0 , «Атырау» SD Family клубын 6:0, «Астана» «Жеңісті» 1:0 есебімен жеңді.