«Қазцинк» кәсіпорнындағы жарылыстан зардап шеккендердің бірі санавиациямен Астанаға жеткізіледі

ШҚО Денсаулық сақтау басқармасының мәліметіне сүйенсек, республикалық деңгейдегі мамандар облыстық мамандандырылған медициналық орталыққа барып, ем алып жатқан науқастарға қосымша тексеру жүргізген.

- 1983 жылы туған, бел омыртқасының үшінші омыртқасы сынған пациентті дәрігерлер қарап шықты. Оны әуе көлігімен тасымалдауға болады деген қорытынды жасалды, - деп хабарлады ведомство өкілдері.

Бүгін ер адамды санитарлық авиация арқылы Астанадағы Ұлттық шұғыл медицинаны үйлестіру орталығына жеткізу жоспарланып отыр. Сол жақта ол ары қарайғы мамандандырылған ем қабылдайды.

Ал ауыр жарақат алған екінші науқастың жағдайы әлі де аса ауыр күйде қалып отыр. Оның денесінің 90 пайызын күйік шалған.

Еске салсақ, осыған дейін «Қазцинктегі» жарылыстан қаза болған 2 жұмысшының отбасына 10 жылдық жалақысына тең өтемақы төленетіні хабарланған.