«Казцинк» ШҚО-дағы кен орындарынан өңірдің дамуына жыл сайын 9 млн теңге төлеп отыр

АСТАНА. KAZINFORM – Шығыс Қазақстан облысында қорғасын, мырыш кеніштерін игеріп отырған «Казцинк» компаниясы өңірдің дамуына жыл сайын 9 млн теңге бөліп отыр. Бұл туралы Премьер-Министр Олжас Бектеновтің депутаттық сауалға жолдаған жауабында айтылған.

- «Казцинк» компаниясының ШҚО-дағы кен орындарын игеру мерзімін ұзарту жөніндегі міндеттемелеріне келсек, заңнамада өңірлік әлеуметтік-экономикалық, инфрақұрылымдық дамуына шығын жұмсау міндеттемелері қарастырылған. Бұл міндеттемені жергілікті атқарушы орган компанияның тиісті өңірде жер қойнауын игеруге берілген құқығының күшінде болатын мерзіміне сай белгілейді. «Казцинк» компаниясы жер қойнауын пайдалану туралы 3 келісімшарт бойынша жылына 9 млн теңге көлемінде әлеуметтік-экономикалық даму шығындарын өтеуге міндеттелген. Келісімшарт мерзімі таяған жағдайда жер қойнауын пайдаланушы оны ұзарту өтінішімен өкілетті органға жүгінеді. Ол өтінімдер қолданыстағы заңнама бойынша қарастырылады, - деп жазылған жауапта.

Аталған сауалда депутаттар қорғасын мен мырышқа деген сұраныстың құбылуына байланысты пайдалы қазбаны игеру салығының мөлшерлемесін азайту туралы мәселе көтерілген болатын.

- Пайдалы қазбаны алуға салынатын салық мөлшерлемесін азайту, соның ішінде қорғасын мен мырышқа 6,5% мөлшерлеме белгілеу туарлы айтсақ, бұл салықтың түрін есептеуде тиісті салық төлеу мерзіміндегі пайдалы қазбаның биржадағы орташа құны негізге алынады. Қолданыстағы заңнамада пайдалы қазбаны алу салығының мөлшерлемесі қорғасынға 10,4%, мырышқа 10,5% болып белгіленген. Салық кодексінің 746-бабының 2-тармағы бойынша кен орнының рентабельділігі 5% және одан да аз болса, жер қойнауын игеруші 2021 жылдың 31 желтоқсанына дейінгі салық мөлшерлемесін қолдануға хақылы, - деп жазады Олжас Бектенов.

ШҚО-ның Серебрянск қаласындағы респиратор зауыты қайта түлейтіні айтылған.