Кеден органында тұтас бір индустрия деп атауға болатын сыбайластық орта қалыптасты - ҚР Мемлекеттік хатшысы

   АСТАНА. 10 қазан. ҚазАқпарат - Кеден жүйесіндегі жемқорлық одан әрі өршімесе, кемитін түрі жоқ.
None
None

Бүгін  Ақордада Қазақстан Республикасының Президенті жанындағы Сыбайлас жемқорлыққа қарсы күрес мәселелері жөніндегі комиссияның отырысында ҚР Мемлекеттік хатшысы Мұхтар Құл-Мұхаммед осылай айтты.

«Елбасымыздың әлденеше рет қатаң ескертуіне қарамастан еліміздегі жемқорлық деңгейінің төмендеуі өте баяу жүруде. Ол, әсіресе, кеден органдарында ерекше көрініс табуда. Атап айтқанда, кеден органында тұтас бір индустрия деп атауға болатын сыбайластық орта қалыптасты»,-деп тоқталды ҚР Мемлекеттік хатшысы.

М.Құл-Мұхаммедтің сөзіне қарағанда, 2010 жылдан бері бұл саланың 192 қызметкеріне қылмыстық іс қозғалса да кеден жүйесіндегі жемқорлық одан әрі өршімесе, кемитін түрі жоқ.

«Кеден одағына кіруге орай мұндағы жағымсыз жағдайлар одан әрі күшейе түскен. Сондықтан осыған байланысты барлық мәселелер мемлекеттің қатаң бақылауында болуы тиіс», - деп атап өтті ол өз сөзінде.  

Айта кетейік, отырыс кезінде Ұлттық Қауіпсіздік комитетінің төрағасы Н. Әбіқаевтың, Кедендік бақылау комитетінің төрағасы М. Есенбаевтың, Экономикалық қылмысқа және сыбайлас жемқорлыққа қарсы күрес агенттігінің төрағасы Р. Түсіпбековтің, Бас прокурор А. Дауылбаевтың, сонымен қатар бірқатар министрліктер мен мекемелердің басшыларының есептері тыңдалды.

Отырыс барысында сөйлеушілер кеден саласындағы орын алған сыбайлас жемқорлық мәселесі туралы өткір де ашық пікірлер айтты, сондай-ақ БҰҰ рейтингінде жоспарлы түрде жоғарылатуға жеткізетін Қазақстан Республикасының «Электрондық үкіметінің» дамуына тиісті алғышарттар  берілгенін атап өтті.

Комиссия отырысының қорытындысы бойынша мемлекеттік органдарға тиісті ұсынымдар берілді.

Соңғы жаңалықтар