KEGOC құнды қағаздарды орналастыру параметрлерін бекіткен соң IPO-ға шығу мерзімін жариялайды

АСТАНА. 8 мамыр. ҚазАқпарат - Қазақстанның Біртұтас электр энергетикалық жүйесінің жүйелік операторы «KEGOC» АҚ құнды қағаздарды орналастыру параметрлерін бекіткен соң IPO-ға шығу мерзімін қосымша жариялайды, деп хабарлады ҚР Премьер-Министрінің ресми сайты аталған компанияның баспасөз қызметіне сілтеме жасап.

«Барлық қажетті құжаттар белгіленген тәртіппен компанияның жалғыз акционері «Самұрық-Қазына» ҰӘҚ» АҚ пен ҚР Үкіметіне қарауға және шешім қабылдауға жіберілді. Орналастырудың негізгі параметрлері бекітілгеннен кейін KEGOC-тың IPO-ға шығу мерзімі белгіленеді және жария етілетін болады», - делінген «KEGOC» АҚ мәлімдемесінде.

Мәлімдемеде айтылғандай, қазіргі уақытта компания кеңесшілер тобымен бірлесе отырып, «KEGOC» акциялар топтамасын қаржы нарығына шығару бойынша дайындық шаралары мен ішкі корпоративтік рәсімдерді аяқтады.