Келіні енесінің әшекейін сатып жіберіп, қылмысты жасырмақ болған

АСТАНА. KAZINFORM – Қосшы қаласының тұрғыны енесінің алтын жүзігін ломбардқа өткізіп, құрбысының алдында ақшалай қарызынан құтылған. Бұл туралы Ақмола облысының прокуратурасының баспасөз қызметі хабарлады. 

Кейіннен бұл оқиғаны ол ененсінен жасыру үшін үйіндегі заттарды шашып, жалған ұрлық ұйымдастырып, полицияға хабарлаған.

Қосшы қаласы прокуратурасының үйлестіруімен, полиция бөлімі тергеушісінің кәсібилігінің және істі егжей-тегжейлі тергеп-тексеруінің нәтижесінде оқиғаның шынайы мән-жайы анықталды.

— Нәтижесінде азаматша «Н» қылмыс жасалғаны туралы көрiнеу жалған сөз жеткiзгені үшін Қылмыстық кодексінің 419-бабының 2-бөлігімен қылмыстық жауапкершілікке тартылды, — делінген хабарламада.

Бұндай қылмыс үшін бес жылға дейінгі мерзімге бас бостандығынан айыру жазасы қарастырылғаны туралы прокуратура ескертеді.