Кеңгір су қоймасының маңынан 70 шақты киіктің өлексесі жиналды
ЖЕЗҚАЗҒАН. KAZINFORM – Төтенше жағдайлар қызметкерлері Ұлытау облысы Кеңгір су қоймасының маңынан 70 шақты киіктің өлексесін тапты.
ҚР Төтенше жағдайлар министрлігі баспасөз қызметінің мәліметінше, Ұлытау облысындағы Кеңгір су қоймасының «Водосброс» және «Спутник» саяжайы маңында киік өлекселерін жинау жұмыстары жүргізілді. Құтқарушылар жағалаудағы аумақты мұқият тексеріп, табиғатқа зиян келтірмеу мақсатында қажетті шаралар қабылдап жатыр.
— Жүргізілген жұмыстар нәтижесінде 67 өлексе табылып, «Охотзоопром» РМКК қызметкерлеріне тапсырылды. Іс-шаралар экологиялық ахуалды тұрақты бақылауда ұстау және жануарлар дүниесін қорғау мақсатында жалғасады, - делінген хабарламада.
Еске сала кетейік, бұған дейін киік өрісімен шектесетін шаруашылық жер телімдерінің шекарасы қайта белгіленуі мүмкін екенін жазған едік.
