Кескен-Күйік: көне қаланың жаңа құпиялары зерттеліп жатыр
Жобаны Еуразияны зерттеу қоғамының қаржылық қолдауымен «Rutrum» ЖШС қолға алды. Қазақстандағы жетекшісі – тарих ғылымдарының кандидаты Дмитрий Воякин.
- Цитадельдегі қазба жұмысы барысында 6 құрылыс нысаны, бірнеше қайта құрылу кезеңі және бір бөлмедегі алтарлық орындардың 5 деңгейі анықталды. Құрылыс қабаттарының бірінен жақсы сақталған монета табылды. Алдағы зерттеулер ескерткіштің хронологиясын нақтылауға мүмкіндік береді, - деп мәлімдеді Қазалы аудандық мәдениет бөлімі.
Кескен-Күйік қалашығы ежелгі дереккөздерде Хувара қаласы деп аталады. Ху «жақсы қала», вар «орын» деген мағынаны білдіреді.
- Көлемі жағынан бұл қала осы аймақта астана болған Жанкент қалашығынан асып түседі. Зерттеу барысында заманауи геодезиялық түсірілім, 3D-сканерлеу, фотограмметрия және аэрофототүсірілім әдістері қолданылды, - делінген хабарламада.
Мамандар ежелгі шаһарды жүйелі зерттеу Қазалы өңірінің көне тарихы мен мәдени мұрасын ғылыми тұрғыдан зерделеуге ықпал етеді деп есептейді.
Еске салайық, Мәдениет және ақпарат министрлігінің жоспарына сәйкес биыл Қызылорда облысындағы республикалық маңызы бар тарихи-мәдени ескерткіштер реставрациядан өтіп жатыр.
