Кейбір адамдардың МӘМС-ке жарнасын әкімдіктер қаражаты есебінен төлеу қарастырылып жатыр

АСТАНА. KAZINFORM — ҚР Денсаулық сақтау министрлігі медициналық сақтандырудан тыс қалған халықтың бір бөлігін қамтуға қатысты түсінік берді. Себебі осы адамдар скрининг, медициналық тексерумен қамтылмай отыр.

«Мемлекет басшысының тапсырмасы бойынша азаматтарды медициналық сақтандырумен қамту жөнінде жұмыстар атқарылып жатыр. Осыған байланысты сақтандырылмаған азаматтарды тартуда жергілікті атқарушы органдардың қатысуын қарастыратын бірқатар нормативтік-құқықтық актілерге түзетулер әзірленді. Яғни азаматтардың жекелеген санаттары үшін МӘМС-ке жарнаны облыстардың, республикалық маңыздағы қалалар мен елорда әкімдіктерінің қаражаттары есебінен төлеу мәселесі қарастырылып отыр. Сақтандырылмаған адамдар үшін тегін медициналық көмектің кепілдік берілген көлемі аясында медициналық көмек қолжетімді болып қалады», - делінген министрліктің Kazinform агенттігіне берген жауабында.

Тегін медициналық көмектің кепілдік берілген көлемі шеңберіне мыналар:

- жедел медициналық көмек;

- емхана қызметтері және паллиативтік күтім;

- шұғыл көмек (жаралану, улану және т. б.);

- зертханалық талдаулар (жалпы талдаулар, АИТВ және туберкулез диагностикасы);

- созылмалы және әлеуметтік маңызы бар ауруларды емдеу;

- дәрі-дәрмекпен қамтамасыз ету (диагноздың жекелеген түрлері) кіреді.

«Бұл ретте, сақтандырылмаған азаматтардың санын азайту үшін Қазақстан Республикасы Денсаулық сақтау министрінің м.а. 2023 жылғы 1 желтоқсандағы №703 бұйрығымен халықты МӘМС жүйесіне тарту жөніндегі жобалау тобы құрылды. Премьер-Министр орынбасарының тапсырмасы бойынша облыстық және аудандық деңгейдегі сақтандырылмаған адамдарды МӘМС жүйесіне тарту жөніндегі штабтардың жұмысы ұйымдастырылды. Республикалық деңгейде Денсаулық сақтау бірінші вице-министрінің басшылығымен жобалық кеңсе құрылды. Қор жұмыс жүргізу үшін апта сайын сақтандырылмаған азаматтардың тізімін береді», - деп аталып өткен ведомство ақпаратында.

Өңірлік штабтар алгоритмге сәйкес жұмыстардың орындалуын қамтамасыз етеді.

1) облыстық деңгейде:

- сақтандырылмаған тізімдерді аудандық штабтарға жіберу;

- жұмыспен қамту шараларымен қамту;

- жұмыссыз ретінде есепке қою;

- жергілікті бюджеттен C, D, E санаттағы тұлғаларды қаржыландыру бойынша мәселелерді пысықтау;

- Өңірлік штаб жұмысының барысы туралы апта сайын ақпарат беру.

2) қалалық және аудандық деңгейде:

- халықты ресми жұмыспен қамтуға тарту;

- кәсіпкерлік қызметті тіркеу;

- тұрғындарды жеңілдікті санатқа қосу;

- жұмыспен қамту мәселесі бойынша ақпараттық жүйеге деректерді енгізу (hr.enbek.kz);

- Өңірлік штабқа мәліметтерді ұсыну.

Еске салсақ, былтыр күзде медициналық қызметке жүгінуге мәжбүр 3 млн-нан астам адам сақтандыру жүйесінен тыс қалғаны мәлім болды.

Сол кезде министрлік ауылдардағы 1,5 млн адамды медициналық сақтандыру бюджет есебінен болатынын хабарлады.