ҚХЛ: «Барыс» елордада ЦСКА командасына есе жіберді
АСТАНА. KAZINFORM - Қазақстандық «Барыс» командасы бүгін, яғни 8 наурызда Құрлықтық хоккей лигасындағы кезекті ойынын елордада Ресейдің ЦСКА (Мәскеу) командасына қарсы өткізді.
Бұл кездесуде елордалық клуб негізінен жас хоккейшілерге сенім артты. «Барыс» сапындағы Қазақстан құрамасының екі қақпашысы Никита Бояркин мен Андрей Шутов жарақат алып қалуына байланысты олардың орнын Аркадий Шестаков басты. Сондай-ақ осындай себептермен өзге де жас хоккейшілер мұзайдынға шықты.
Кездесу барысында ресейлік клубтан Владислав Провольнев 1-минутта есеп ашса, 8-минутта Станислав Галиев басымдықты арттырды.
Ал Станислав Галиев 21-минутта қорытынды есепті белгіледі.
Осылайша «Барыс» қарсыласына 0:3 есебімен есе жіберді.
Енді «Барыс» бұдан кейін ҚХЛ-дың тұрақты кезеңінде бес ойынын өткізеді.
Алдымен Ресейде 13 наурызда «Адмирал» (Владивосток) клубымен кездессе, 15 наурызда «Амур» (Хабаровск), 17 наурызда «Сибирь» (Новосібір) клубтарымен ойнайды.
Ал елордада 20 наурызда Ресейдің «Ак барс» (Қазан) командасы 22 наурызда «Салават Юлаев» (Уфа) клубтарымен кездеседі.
