Қырғызстан халықаралық интернет-трафикке уақытша мемлекеттік монополия енгізеді
АСТАНА. KAZINFORM — Қырғыз Республикасының президенті Садыр Жапаров тиісті жарлыққа қол қойды, деп хабарлайды president.kg.
Қырғыз Республикасының президенті Садыр Жапаров «Қырғыз Республикасының мемлекеттік компанияларын тиімді басқаруды ұйымдастыру және цифрлық әрі телекоммуникациялық инфрақұрылымды дамыту жөніндегі шұғыл шаралар туралы» Жарлыққа қол қойды.
— 2025 жылғы 15 тамыздан 2026 жылғы 14 тамызға дейін Қырғыз Республикасының аумағында халықаралық интернет-трафикті жеткізу мен ұсынуға уақытша 100 пайыздық мемлекеттік монополияны енгізу бойынша сынақ (апробациялық) режимі енгізілсін, — делінген құжатта.
Бұл сынақ (апробациялық) режимі кезеңінде халықаралық интернет-трафикті жеткізу мен ұсынуға «ЭлКат» ЖШҚ-на эксклюзивті құқық берілді.
Бұған дейін Садыр Жапаров азаматтың өз банк картасын, шотын, электронды әмиянын, мобильді банкингін, SIM-картасын немесе басқа қаржылық деректерін үшінші тұлғаларға беруге немесе сатуға тыйым салатын заңға қол қойған болатын. Бұл IT-технологиялар арқылы жасалатын қылмыстардың алдын алуға бағытталған.
