Қырғызстан палестиналықтардың Газадан күштеп көшірілуіне қарсы шықты
БІШКЕК. KAZINFORM – Женевада өткен БҰҰ Адам құқықтары кеңесінің отырысында Қырғызстан Министрлер кабинеті төрағасының орынбасары Эдиль Байсалов Палестинадағы жағдайға ерекше назар аударды, деп хабарлайды Kazinform агенттігінің меншікті тілшісі.
Қырғызстандық шенеунік халықаралық қауымдастықты әділеттілік үшін шешуші әрекетке шақырды.
- Палестина халқын күштеп көшірудің кез келген әрекеті этникалық тазалаудан басқа ештеңе емес. Біз мұндай бастамаларды үзілді-кесілді қабылдамаймыз және халықаралық қауымдастықты тұтас бір халықты ұжымдық жазалауға жол бермеуге шақырамыз, - деп мәлімдеді ол.
Қырғызстан Палестина халқының өзін-өзі анықтау құқығын қолдайтынын қуаттады. Эдиль Байсалов ұзақ мерзімді бейбітшілік тек халықаралық құқықты құрметтеу және тең диалог арқылы ғана мүмкін екенін атап өтті.
Бұған дейін Мысыр мен Иордания палестиналықтарды қоныстандыруға қарсы шыққанын жазған болатынбыз.
Бұған дейін оқырман назарына шығыстанушы Жанат Момынқұловтың Трамптың Газа секторына қатысты мәлімдемесіне орай берген сұхбатын ұсынған едік.
