Қырғызстанда БАҚ пен интернет арқылы қорлау мен жала жапқандарға жаза күшейтіледі

АСТАНА.KAZINFORM - Қырғызстанда БАҚ пен интернет сайттарында және әлеуметтік желілерде жала жабу мен қорлауға жоғары айыппұл енгізу ұсынылды. Жогорку Кенештің Құқықтық тәртіп, қылмысқа қарсы күрес және сыбайлас жемқорлыққа қарсы іс-қимыл комитеті «Қырғыз Республикасының Қылмыстық кодексіне өзгерістер енгізу туралы» заң жобасын бірінші оқылымда мақұлдады.

Заң жобасында бұқаралық ақпарат құралдарында және интернет-сайттарда балағаттау немесе жала жапқаны үшін жеке тұлғаларға 1000 есептік көрсеткіш (100 мың сом), заңды тұлғаларға 2000 есептік көрсеткіш (200 мың сом) мөлшерінде айыппұл салу көзделген.

Қырғызстан Республикасы Әділет министрінің орынбасары Орозбек Сыдықовтың айтуынша, әлеуметтік желілердегі жазбалар астындағы жала немесе қорлау сипаттағы пікірлер үшін де жауапкершілік қарастырылған.

Бұған дейін Қырғызстанда интернетте жала жабу мен балағаттау үшін жазаны күшейту ұсынылғаны хабарланған болатын. Сонымен қатар елде азаматтардың өтініштерін қарау тәртібін бұзғаны үшін мемлекеттік қызметкерлердің жауапкершілігін күшейту ұсынылды.

Сондай-ақ, балаларын қорғанышы мен қамқоршысынсыз қалдырып, еңбек көші-қонымен кеткен ата-аналарға айыппұл салу ұсынылып отыр. Мектептерде ақша жинағаны үшін айыппұл енгізу көзделді.