Қырғызстанда мектепте заңсыз ақша жинағандарға айыппұл салынбақ

БІШКЕК. KAZINFORM - Қырғызстан Жогорку Кенешінің әлеуметтік саясат комитеті мектептерде заңсыз ақша жинау үшін айыппұл салуды көздейтін кейбір заңнамалық актілерге түзетулер енгізу жобасын қабылдады, деп хабарлайды Kazinform агенттігінің меншікті тілшісі.

Заң жобасы мектептерде заңсыз қаражат жинауды және қоғамдық қорлар құруға жол бермеу мақсатында әзірленген. Бұл ретте құжат меценаттыққа және демеушілік көмек көрсетуге ешқандай кедергі келтірмейді.

Құқық бұзушылық туралы Кодекске «Мемлекеттік жалпы білім беретін ұйымдарда ақша қаражатын заңсыз жинау» деп аталатын 74-1-бабын енгізу ұсынылып отыр. Оны бұзғаны үшін жеке тұлғаларға 200 есептік көрсеткіш (20 мың сом немесе 114 мың теңге) мөлшерінде айыппұл көзделеді. Егер бұл заң бұзушылық мектеп жанынан қоғамдық қор құру арқылы жасалса, онда жеке тұлғаларға 400 есептік көрсеткіш (40 мың сом немесе 229 мың теңге) және заңды тұлғаларға 600 есептік көрсеткіш (60 мың сом немесе 344 мың теңге) мөлшерінде айыппұл салынады.

Бұған дейін Қырғыз Республикасы Жогорку Кенешінің Құқықтық тәртіп, қылмысқа және сыбайлас жемқорлыққа қарсы іс-қимыл комитеті Қырғыз Республикасының Білім туралы заңына, Құқықбұзушылық туралы кодексіне мектепте заңсыз ақша жинағаны үшін айыппұл салуды қарастыратын түзетулерді бірінші оқылымда қабылдаған болатын.

                                                                                                                                                                                                                                     Арайлым Қалдарбек