Қырғызстанда пара алды деген күдікпен судья ұсталды

АСТАНА. KAZINFORM - Бішкекте 22 мың доллар пара алғаны үшін  Ленин аудандық сотының судьясы ұсталды, деп хабарлайды Kazinform агенттігінің меншікті тілшісі.

Қырғыз Республикасы Ұлттық қауіпсіздік мемлекеттік комитетінің (ҰҚМК) мәліметінше, ұсталған А.М.А. адвокат М.С.А. арқылы делдалдық жолмен азаматтық іс бойынша оң шешім қабылдау үшін ақша алған.

Қырғыз Республикасының Бас прокуроры судья мен адвокатқа қатысты Қылмыстық кодекстің 342-бабы («Жауапты мемлекеттік лауазымды тұлғаның ірі көлемде пара алуы») бойынша қылмыстық іс қозғады.

13 ақпанда Қырғыз Республикасы Судьялар кеңесінің шешімі негізінде Бішкектің Ленин аудандық сотының судьясы А.М.А. Қырғыз Республикасы Ұлттық қауіпсіздік мемлекеттік комитетінің тергеу изоляторына қамауға алынды.

Қазіргі уақытта аталған фактілерді құжаттау және ұсталған судья мен басқа да тұлғалардың осындай қылмыстық әрекеттерін анықтау бойынша тергеу амалдары жалғасып жатыр.

Бұған дейін Қырғызстанда Парламент құрудың жаңа тетігі қарастырылып жатқаны туралы жазған едік.