Қырғызстандық әуе компания Қазақстанға тікелей рейстерді іске қосады

АСТАНА.KAZINFORM - Көлік министрлігі 27 маусымнан бастап Қазақстанның авиациялық нарығына Қырғызстанның әуе компаниясы – «Asman Airlines» кіретінін хабарлады.

Компания Алматы – Ыстықкөл бағыты бойынша аптасына екі рет (дүйсенбі және жұма күндері) тұрақты тікелей жолаушы рейстерін орындай бастайды. Сонымен қатар 3 шілдеден бастап қазақстандық «Fly Arystan» әуе тасымалдаушысы да Алматы – Ыстықкөл бағыты бойынша тікелей рейстерді іске қосады.

Рейстер аптасына екі рет – бейсенбі және жексенбі күндері орындалады. Осылайша, жазғы кезеңде көрсетілген бағыт бойынша аптасына 4 тұрақты жолаушы рейсі орындалатын болады.

Әуеқатынастың ашылуы екі ел арасындағы туристік, сауда-экономикалық және іскерлік ынтымақтастықтың одан әрі дамуына ықпал етеді.

Айта кетейік, Қытайдан Алматыға тағы бір тікелей рейс іске қосылды.

Қазақстан әуе компаниясы 25 маусымнан бастап Таяу Шығысқа қайта ұшады.