Қырғызстанның мемлекеттік органдарына жыл соңына дейін елдегі барлық үйді сақтандыру тапсырылды
АСТАНА.KAZINFORM – Қырғызстан Министрлер Кабинетінің төрағасы Ақылбек Жапаров сел салдарын жоюға арналған кеңесте мүдделі мемлекеттік органдарға 2024 жылдың соңына дейін елдегі барлық үйді сақтандыруды тапсырды.
Қырғызстан Төтенше жағдайлар министрлігінің мәліметі бойынша, 2024 жылдың қыркүйегіндегі жағдай бойынша елде 331 сел оқиғасы тіркелген. Зардап шеккен 5 354 үйдің 102-сі зақымданды, 138-і күрделі жөндеуді қажет етеді.
Ақылбек Жапаров құзырлы мемлекеттік органдардың алдына 2024 жылдың соңына дейін барлық үйді, соның ішінде қауіпті аймақта орналасқан үйлерді сақтандыру міндетін қойды. Бұл мұндай жағдай қайталанған жағдайда азаматтарды қаржылық қорғауды қамтамасыз етіп, баспанасынан айырылған отбасылар үшін зардаптарды барынша азайтатыны айтылды. Оның пікірінше, сақтандыру халықтың табиғи апаттан тезірек сауығып, мемлекет бюджетіне түсетін ауыртпалықты азайтуға көмектесетін маңызды құралға айналады.
– Жаһандық жылынуға байланысты жыл өткен сайын табиғи апаттар саны артып келеді. Осыған байланысты жылжымайтын мүлікті сақтандыру халықтың қауіпсіздігі мен табиғи апат зардаптарына төзімділігін қамтамасыз ететін қажетті шараға айналады, - деді ол.
Естеріңізге сала кетейік, маусым айының соңында Ош облысының Ноокат ауданында жойқын сел жүріп, тұрғындар мен туристер құрбан болған болатын. Қаза тапқандар арасында қазақстандық кәмелетке толмаған балалар да бар. Апат салдарынан 2 көпір мен 10 электр бағанасын су шайып, 30 тұрғын үй мен ауланы, балабақшаны су басқан.
Ал, 14 шілде күні Ошта болған жойқын сел салдарынан бір әйел үш қызымен бірге қаза тапты.
Тамыз айында Ыстықкөл облысының кейбір аудандарында нөсер жауыннан кейінгі сел тасқынынан көліктердің жүруіне шектеу қойылған бірқатар жолдарды су басып, 497 үйді, 3 әлеуметтік нысан мен мәдениет үйін су басқан.
