Қыркүйекте Jibek Joly арнасынан жаңа «111 Juz on bir» сериалы көрсетіледі
АСТАНА. KAZINFORM — Жаңа телевизиялық маусымда Jibek Joly телеарнасында «111 Juz on bir» телехикаясының премьерасы болады.
111 Juz on bir — детективтік драма жанрындағы 40 сериялы фильм. Сюжет әйелдерді зорлық-зомбылықтан қорғау бөлімшесі қызметкерлерінің күнделікті өмірін көрсетеді.
Басты кейіпкер — инспектор Айжан Қамбарова сүйікті адамынан айырылғаннан кейін бар уақытын жұмысына арнайды. Жұмыс барысында кейіпкер әртүрлі қиындықтарға тап болады, оған жиі тұрмыстық зорлық-зомбылық құрбандарына көмектесуге және қылмыстық тергеуге қатысуға тура келеді.
Айжанның бөлімінде бірнеше қызметкер бар. Олардың әрқайсының басынан түрлі оқиғалар өткен, бірақ олар бәрін жеңген және ең бастысы өз миссияларына адалдықтарын сақтап қалады.
«111 Juz on bir» тележобасында елімізде тұрмыстық зорлық-зомбылықтың алдын алу жүйесін жетілдіру, мұндай жағдайларға жедел ден қою шаралары, тұрмыстық зорлық-зомбылық жасағандарға жазаны қатайту бағытында атқарылып жатқан жұмыстар көрсетіледі. Ал телехикаяның ең маңызды хабары тақырыпта көрсетілген.
111 — отбасы, әйелдер және балалар құқығы мәселелері бойынша жан-жақты көмек көрсету қызметінің қазіргі байланыс орталығының нөмірі.
111 — 24/7 жұмыс істейді, ПД және өңірлердің жедел топтарымен байланыста.
Балаларға қатысты зорлық-зомбылық жаһандық проблема болып қала береді. Дүниежүзілік денсаулық сақтау ұйымының мәліметінше, әлемде әрбір үшінші әйел өмір бойы зорлық-зомбылықты бастан кешіреді және бұл көбінесе өз үйінде болады.
2024 жылғы сәуірде Қазақстанда Қазақстан Республикасының Президенті Қасым-Жомарт Тоқаев «Қазақстан Республикасының кейбір заңнамалық актілеріне әйелдердің құқықтарын және балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» заңға қол қойды.
Осындай өзекті тақырыпта телехикая жасау — тұрмыстық зорлық-зомбылық мәселесіне қоғамның назарын аудару және оған деген көзқарасты өзгерту жолындағы маңызды қадам. Авторлардың айтуынша, фильм әйелдерді өздерін құрметтеуге, көмек пен құқық қорғау органдарына жүгінуден ұялмауға шақырады.
Сериал жұмысына білікті режиссерлік топ тартылған: Бейбіт Өнер, Берік Жаханов, Модияр Абдуқадыров және Евгений Паламарчук.
Актерлер құрамы да жақсы таңдалған. Сериалдан атақты актерлерді де, дебютанттарды да кездестіруге болады.
Басты рөлдерді Жанель Серғазина мен Еркебұлан Дайыров сомдайды. Жобаға сонымен қатар Асан Мәжит, Ермек Шынболатов, Жарқынай Ханайым, Айнұр Болат және т. б. қатысады. Продюсері Анар Жүнісова мен Анна Чакиртова.
Телекөрермендер «111 Juz on bir» драмасының бірінші бөлімін 16 қыркүйекте Jibek Joly телеарнасынан тамашалай алады.
Сериал жұмыс күндері сағат 22:00–де көрсетіледі.
PS: 2021 жылы ел Президенті полиция бөлімдерінде әйел тергеушілерден жедел топтар құруды тапсырды. Ал 2023 жылы Қарағандыда алғашқы әйелдер полициясы бөлімшесі ашылды. Оның құрамында психологтар, заңгерлер, сот орындаушылары, ювеналдық полиция, теологтар, волонтерлар, медиаторлар, әлеуметтік қызметкерлер және т. б. бар.
Ал 2024 жылы Ішкі істер министрлігі құрылымында жаңа қызмет — әйелдерді зорлық-зомбылықтан қорғау бөлімшесінің пайда болғанына 25 жыл болды.
Ол әйелдердің конституциялық құқықтарын, бостандықтары мен мүдделерін заңсыз шабуылдардан қорғау, оларға зорлық-зомбылық әрекеттерінің алдын алу және жолын кесуде құқықтық көмек көрсету мақсатында құрылған.
Бөлім полиция мен үкіметтік емес секторларды, сондай-ақ мемлекеттік органдарды байланыстырады.
