Қытай АҚШ-тың қосымша баж салығын арттыруына қарсы шағым түсірді
АСТАНА. KAZINFORM – 2025 жылғы 27 наурыз күні түстен кейін Қытай Халық Республикасының Сауда министрлігі кезекті баспасөз мәслихатын өткізіп, Қытайдың АҚШ-тың қосымша баж салығын енгізуіне қатысты Дүниежүзілік сауда ұйымының (ДСҰ) дауларды шешу механизмі шеңберінде шағым түсіргенін мәлімдеді, деп хабарлайды Kazinform thepaper.cn сайтына сілтеме жасап.
Қытай Халық Республикасының Сауда министрлігінің ресми өкілі Хэ Ядун мәлімдемесінде:
— АҚШ-тың Қытайдан экспортталатын тауарларға қосымша баж салығын енгізуі — бұл біржақты және протекционистік әрекет болып табылады және ДСҰ ережелерін өрескел бұзу саналады. Осыған байланысты Қытай бұл мәселе бойынша ДСҰ дауларды шешу механизміне жүгінді. 14 наурызда АҚШ тарапы ДСҰ-да келіссөздер жүргізуге келісті. Қытай бұдан әрі ДСҰ нормаларына сәйкес тиісті рәсімдерді жалғастырады, — деді.
Бұған дейін, 25 наурызда өткен баспасөз мәслихатында Қытай Сауда министрлігінің өкілі АҚШ-тың бірнеше қытайлық компанияларды экспорттық бақылау тізіміне енгізуін сынға алып, оны «ұлттық қауіпсіздік тұжырымдамасын кеңінен пайдалану және экспорттық бақылау шараларын асыра қолдану» деп атаған болатын.
Қытай тарапының айтуынша, бұл қадам «басқа елдердің компанияларын басып-жаншу және олардың дамуға деген заңды құқықтарын шектеу мақсатын көздейді», сондай-ақ «жаһандық өндірістік және жеткізу тізбектерінің қауіпсіздігі мен тұрақтылығына айтарлықтай зиян келтіреді».
— АҚШ-тың бұл әрекеті екіжақты диалог пен ынтымақтастық арқылы мәселелерді шешу үшін қолайлы орта қалыптастыруға ықпал етпейді. Қытай тарапы АҚШ-ты өз қателігін дереу түзетуге шақырады және Қытай компанияларының заңды құқықтары мен мүдделерін қорғау үшін қажетті шараларды қабылдайтын болады, — деп мәлімдеді Қытай Сауда министрлігінің өкілі.
Бұған дейін Қытайдың Сыртқы істер министрлігі АҚШ-тың экспорттық бақылау құралдарын асыра пайдаланып, заңсыз біржақты санкциялар енгізуін айыптаған болатын.
