Қытай болашақтың ғарыштық ауруханасын құрмақ
АСТАНА. KAZINFORM — Шэньчжэнь озық технологиялар университеті мен Шанхай микроспутниктер инженерлік орталығы болашақ ғарыш ауруханасын бірлесіп құру жөніндегі ынтымақтастық туралы келісімге қол қойды, деп хабарлайды Синьхуа ақпарат агенттігі.
Жоба ғарышкерлердің денсаулығын жақсартуға, ағза жағдайын бақылау мүмкіндіктерін кеңейтуге және орбитада тіршілікті қамтамасыз етуге бағытталған.
Ол аурулардың алдын алу мен емдеудің озық әдістерін, сондай-ақ ғарыштық медицина мен биология саласындағы шешімдерді әзірлеуді көздейді.
Аурухана медициналық құрал-жабдықтарды сынау, инновациялық технологияларды құру және алыс ғарыш жағдайында қолданылатын дәрілерді әзірлеу алаңына айналады.
Тараптар сондай-ақ алыс ғарыштық ауруханалар мен жұлдызаралық көші-қон үшін негізгі технологияларды, эксперименттер мен сынақтарды әзірлеуге, сондай-ақ ұзақ мерзімді миссиялар мен ғарыштық туризмге қатысушылардың денсаулығына қатысты зерттеулер жүргізуге назар аударады.
Бұған дейін Қытайда ғарышты зерттеу жөніндегі халықаралық қауымдастық жұмыс істей бастағанын жазған болатынбыз.
