Қытай Сауда министрлігі: АҚШ-тың «өзара тарифтер» енгізуіне қарсымыз
АСТАНА. KAZINFORM — АҚШ президенті Дональд Трамп бүгін сауда серіктестеріне «өзара тарифтер» енгізді. Осыған байланысты Қытайдан АҚШ-қа экспортталатын тауарларға салынатын жалпы тариф кемінде 54%-ға жетті.
Қытайдың Сауда министрлігі бұл шешімге қатаң қарсылық білдіріп, өз мүддесін қорғау үшін қажетті қарымта шаралар қабылдайтынын мәлімдеді.
Қытай Сауда министрлігінің сайтында жарияланған мәлімдемеге сәйкес, 4 сәуір күні ведомствоның ресми өкілі АҚШ-тың халықаралық саудада «әділетсіздікке тап болдық» деген желеумен барлық сауда серіктесіне жоғары тариф енгізгенін сынға алды. Оның айтуынша, бұл шешім көпжылдық көпжақты сауда келіссөздері арқылы қол жеткізілген мүдделер теңгерімін елемей, нағыз шындықты — АҚШ-тың халықаралық саудадан орасан зор пайда тауып келе жатқанын жоққа шығарады.
Ресми өкілдің мәлімдеуінше, АҚШ-тың «өзара тариф» тұжырымдамасы субъективті және біржақты бағалауға негізделген, бұл халықаралық сауда ережелеріне қайшы және мүдделі тараптардың заңды құқықтарын өрескел түрде бұзады. Ол мұндай әрекетті «біржақты әлімжеттік» деп сипаттап, АҚШ-тың көптеген сауда әріптесінің бұған қатаң наразылық білдіріп, ашық қарсылық танытып отырғанын айтты.
Ресми өкілдің айтуынша, тарифтерді көтеру АҚШ-тың ішкі мәселесін шеше алмайтынын, керісінше, елдің ұлттық мүддесіне зиянын тигізіп, жаһандық экономикалық даму мен өндіру-жеткізу тізбегінің тұрақтылығына қауіп төндіретінін тарих сан мәрте дәлелдеген. Оның сөзінше, сауда соғысында жеңімпаз болмайды, ал протекционизм тек тығырыққа тірейді. Ол АҚШ-ты біржақты тарифтік шаралардан дереу бас тартуға және алауыздықтарды шешу үшін сауда серіктестерімен тең құқылы диалог құруға шақырды.
Трамптың жаңа тариф саясатына сәйкес, АҚШ Қытайдан әкелінетін тауарларға қосымша 34% баж салығын енгізеді. Оған жыл басында күшіне енген 20% тарифті қосқанда, Қытай тауарлары үшін жалпы тариф мөлшері кемінде 54%-ға дейін көтеріліп отыр.
Осыған дейін Президент Дональд Трамп АҚШ-тың барлық сауда серіктесі үшін 10% тарифті және өзінің «Америка бірінші кезекте» атты бағдарламасы аясында өзге ондаған мемлекетке жоғары баж салығын енгізуді қарастыратын, барлық саланы қамтитын пакетін ұсынғанын жазған едік.
