Қытай «Шэньчжоу-22» ғарыш кемесін ұшырды

АСТАНА. KAZINFORM – Қытайдың «Шэньчжоу-22» ғарыш кемесі сейсенбі күні Қытайдың солтүстік-батысындағы Цзюцюань ғарыш айлағынан ұшырылды, деп хабарлайды Синьхуа ақпарат агенттігі. 

ҚХР ғарышқа ұшыру бағдарламасы басқармасының мәліметінше, ғарыш кемесін ұшыру үшін Long March-2 °F Y22 зымыран-тасығышы пайдаланылған.

Ведомство Қытай ғарыш станциясына қазан айында келген «Шэньчжоу-21» ғарыш кемесінің экипажы орбитада қалыпты жұмыс істеп жатқанын атап өтті.

Еске сала кетсек, «Шэньчжоу-20» ғарыш кемесіне ғарыш қоқысы соғылғаннан кейін экипаждың 5 қарашаға жоспарланған оралуы кейінге қалдырылды. 15 қарашада үш қытайлық тайконавт 204 күндік миссиясын аяқтап, Жерге аман-есен оралды.

Бұған дейін ғарышта ұзақ уақыт қалып қойған тайконавтар Жерге оралғанын жазған болатынбыз.