Қытайда «нөмір бірінші су тасқыны» тіркелді

АСТАНА. KAZINFORM — ҚХР Су шаруашылығы министрлігі жанындағы Хайхэ өзенінің су шаруашылығы істері комитеті Луаньхэ өзенінде дүйсенбі күні болған тасқын елдің негізгі өзендерінің арасында 2025 жылы «нөмір бірінші су тасқыны» санатына жатқызылғанын хабарлады, деп хабарлайды Синьхуа.

Толассыз жауған жаңбыр Луаньхэ өзеніндегі су деңгейінің көтерілуіне себеп болды. Ведомствоның мәліметінше, дүйсенбі күні сағат 04:30–да Луаньхэ өзені негізгі ағынындағы Панцзякоу су қоймасына құйылатын су секундына 2270 текше метрге дейін көтерілген.

Тиісті стандарттарға сәйкес, дүйсенбі күні Луаньхэ өзенінде тіркелген су тасқыны өзенде және елдің ірі өзендерінің арасында 2025 жылы «нөмір бірінші су тасқыны» санатына жатқызылды.

Дүйсенбі күні кешке Паньцзякоу су қоймасына келетін судың ең жоғары деңгейі секундына шамамен 4000 текше метрге жетеді деп күтіліп отыр.

Хайхэ өзені бассейнінде орналасқан Бейжің де соңғы күндері қатты жауған жаңбырдан зардап шекті, Қытай астанасының Миюнь маңындағы 3 мыңнан астам тұрғын эвакуацияланды.

Бұған дейін Қытайдың 5 өңірінде су тасқынына байланысты төтенше әрекет режимі енгізілді.